Zelal Tunç

 

WAN - Wanijan reaksîyon vera tayînkerdişê qeyûmî yê seba şaredarîya Colemêrgî mojnayî û dîyar kerdî ke qeyûm tewr zêde destkewtişê cinîyan hedef gêno û wina vatî: “Ganî cinî vengê xo berz bikerê. Ewro hemverê qeyûmê Colemêrgî veng nêro vetiş, do tayînê pêro şaredarîyan bibê. Ganî şarê kurdî bibo yew.”

 

‘Tayînkerdişê qeyûman plankerde bî’

 

Cinîya bi nameyê Zeynep Tagtekîn da zanayîş ke AKP dimayê weçînayîşê 31ê Adare hêrişê hemverê destkewtişê şarê kurdî dewam kerdo û vat: “Dimayê weçînayîşê Curnê Reşî ke ame girewtiş, qeyûm tayînê şaredarîya Colemêrgî kerdî. Samimîyetê lîsteyê sûcî ke wezareta karê zerreyî weşan kerdo, çin o. Eke sûcêk bibo do YSKyî bikerdêne. La qeyûm amebi plankerdiş. Ma nimûneyê ci Wan de dî.”

 

‘Ma do seba Colemêrgî têkoşîn bikerê’

 

Nurgul Erîk zî wina vat: “Ganî hemverê îradeyê şarî rêzdarî bibo. No yeno manaya çin hesibnayîşê şarî. No dizdî yo. Ma heta nika pratîkê qeyûman dî. Heta nika bi qeyûman ameyo rayîr ra berdiş. Wa îradeyê şarî îdare bikero. Ma kîşte colemêrgîyîjan de yê. Ma senî seba Wanî têkoşîn kerd, ma do seba Colemêrgî zî têkoşîn bikerê.”

 

‘Ma qeyûman qebûl nêkenê’

 

Sevîm Yerlî zî reaksîyon vera rewşe mojna û vat, ganî pêro şar, seba Colemêrgî wurzo serê payan û  qeyûman qebûl nêkerê.”

 

Arzu Ertaş zî dîyar kerd ke hemşaredarê Colemêrgî tu sûcê ci çin o û wina vat: “No nêheqîyêk pîl o. Çi destê ma ra yeno ma do bikerê. Seba ke dewleta ma çin a, no yeno sereyê ma. Ma hemverê cezayê  ke sîyasetmedarê ma rê ameyê birnayîş bêveng nêmendêne do ewro qeyûm nêameyîne tayînkerdiş.”

 

‘Wa şarê kurdî wurzo serê payan’

 

Gulden Işik zî da zanayîş ke ganî şarê kurdî wurzo serê payan û nê zulmî qebûl nêkero. 

 

Habîbe Şen zî dîyar kerd ke ganî sere wedarnê, xo ver bidê û şarê kurdî bibo yew û wina vat: “Êdî bes o. Wa Homa heqê ma înan rê nêverdo. Ganî şarê kurdî bibo yew.”

 

Zehra Şahîn zî reaksîyon mojna û wina vat: “Bi serran o hemverê şarê kurdî de hêriş û tedayî est ê. Madem netîceyê weçînayîşî qebûl nêkenê, çira weçînayîş kenê. Wa raste rast îdare bikerê. Çira hende amadekarî, çira hende merdiman bêzar kenê. Eke reaksîyon hemverê qeyûmê Colemêrgî nêro dayîş do qeyûm tayînê her cayî bêro kerdiş.”