Elfazî Toral

 

STENBOL - Cinîyan derheqê 9ine Paketa Hukmî ke hetê îqtîdarî ra ameya amadekerdiş û yena pawitiş ke rojê bêro de bêro meclîs, reaksîyonê xo dîyar kerdî û vatî: “Ma na paketa hukmî qebûl nêkenê. Hemverê na pakete de yê û vatî, ê vanê: ‘keye keleya ma ya tewr xurt o’ ma vanê, ‘keleya ma ya tewr xurte cinî ya’. Ma hemverê polîtîkayê îqtîdarî de kuçeyan de têkoşînê xo pîl bikerê.”

 

9ine Paketa Hukmî ya hetê wezaretê edaletî ra ameya amadekerdiş yeno pawitiş ke rojê bêrê de bêro meclîs. Pakete de xeylê çîyê cinîyan eleqedar kenê derbaz benê. Qanûn de wexto ke cinî bizewicîyayîne peynameyê mêrdeyê xo girewtêne û goreyê waştişî eşkayîne ê xo zî bigirewtêne. Nê madeyî de wazenê ke vurnayîş bikerê. Serekkomar Tayyîp ERdogan qiseykerdişê 19ê Gulane de vat, ‘Keye kelaya înan tewr saxlem o’. Cinîyan zî bi vatişê, ‘Keleya ma ya tewr saxlem cinî yê’ reaksîyon mojnayî.

 

‘Keleya ma ya tewr saxlem cinî yê’

 

Merve Dursun îfadeyê îqtîdarê AKPyî yê sey ‘Keye kelaya ma yo tewr saxlem o’ ard vîr û wina vat: “Dewlete seba hêzê camêrdî û sîstemê pederşahî esas gêno, tenê keda cinî keye de vîneno û wina gêno dest. Zîhniyetê serdest yê camêrdî xo serê keda cinî de bîyaye keno. 9ine paketa hukmî sîstemê kapîtalîst awan kerda. Ma na pakete qebûl nêkenê. Ma do hemverê nê de têkoşîn bikerê. Ma nê vanê. Kelaya ma ya tewr saxlem cinî yê. Têkoşînê ma yo. Ma do têkoşînê xo yê femînîst heta peynî rayîr ra berê.”

 

‘Do têkoşînê cinîyan îqtîdar bişirawo’

 

Endama Paştdayîşê Morî Hazal Endekçî zî dîyar kerd ke senî ke îqtîdar hêzê xo vînî keno, tedayê serê cinîyan zêde keno û wina vat: “Wazeno cinîyan hepsê keyeyî bikero. Seba ke îqtîdar zano do hêrs û têkoşînê cinîyan înan bişirawo. Têkoşînê rêxistinkerde yê cinîyan do îqtîdarî bişirawo.”

 

‘Ma do têkoşînê pîl bikerê’

 

Hazale bale ant serê 9ine paketa hukmî û wina vat: “Ma nika 9ine paketa hukmî vînenê ke îqtîdar destkewtişê cinîyan ke bi têkoşînî bi dest kerdê, gêno. La ê ma baş nas kenê. Ma do heqanê xo înan ra bigîrê. Cinî do hemverê pêro paketa hukmî bêveng nêmanê. Do nêeşkê vernîya têkoşînê ma bigîrê. Ma do têkoşînê xo kuçeyan dewam bikerê.”