Pelşin Çetinkaya

 

ÊLIH - Emîne Yillmaz Aktaş, a ke 13 serrîya xo ra xeyalê xo yê ke waştêne cil û belgê kurdî dîzayn bikero û biderzno ard ca, seba xeylêk cinîyan zî bî nimûne û aye teşwîkê nê karî kerdî.

 

Pêwa ke kultur çar hetê dinya de binê tehlukeyê çinbîyayîşî de yo, cil û belgî nîşaneyê muhîm yê nê kulturan ê. Hetêk ra hetê kapîtalîzmî ra binê nameyê  “moda” de motîfê kulturî werte ra yenê wedaritiş û hetêk bîn ra zî hemverê nê caardişî têkoşînêk pîl ê  kesan ke kulturê xo wazenê bipawê est o. Emîne Yilmaz Aktaş zî yew nê kesan ra ya ke seba nasnayîş û pawitişê cil û belgê neteweyî yê kurdî ke parçeyêk kulturê kurdanê têkoşîn dana ya.

 

Cizîr yewin rey cinîyan atolye akerd

 

Emîne ke 13 serrîya xo de şî Stenbol, meslegê tekstîlî de dest bi şagirtî kerd. Emîne ke demêk kilm de musa, Stenbol de nêzdîyê 18 serrî tekstîl de xebitîya û dima ra ameye qezaya Cizîrî ya Şirnexî. Emîne tîya de dest bi derznayîşê cilanê neteweyî kerd û seba cinî bixebitîyê atolyeya cinîyan akerd, bi nê helwestî xo seba cinîyan zî wareyê îstîhdamî awan kerd. Atolyeya ke destpêk de hem cil û belgê rojane û hem zî cil û belgê neteweyî ameyîne deştiş, cinîyan dimayê demêk dest bi derznayîşê cilanê tewir bi tewir kerdî. Emîne dîyar kerd ke nê derznayîşê cilê tewir bi tewir bi hawayê komî Cizîr ra reya ewilî yo yeno kerdiş û dîyar kerd ke cinî hem hetê komelî û hem zî hetê manewî ra wexto ke tîya şuxilênê xo başêr vînenê.

 

Êlih de karê xo dewam kena

 

Emîne dimayê 3 serran mecbûr mende fek atolyeya Cizîrî ra vera bida, agêrêna cayê dayîkbîyayîşî xo yê Êlihî. Emîne, vat ke demêk kilm de Êlih de kargehêk akerda û wina vat: "Bi rastî seba mi muhîm bî ke cil û belgê ma yê neteweyî herêma ma de bêrê xopaykerdiş û no karê ke kena hewnê mi bî. Hewnê mi o bî ke her kes bi cil û belgê xo yê neteweyî bigêro."

 

Emîne, ard ziwan ke aye deştiş û berardişî ra hes kena û dîyar kerd ke seba nê aye fek karê xo ra vera nêdana. Emîne vana ke cinî karê xo û cayê ke xebitîyenê zî hes kenê û wexto ke cinî xebityenê xo  baş hîs kenê.

 

Tewr peyîn zî Emîne vat ke ê do demê bêro de seba  naskerdişê cil û belgê kurdî şayîyêke zî organîze bikerê.