Rabîa Onver

 

COLEMÊRG - Îdarekarîya ÎHDyî ya Colemêrgî Pinar Yilmaz çalakîyê ke zîndanan de seba tecrîdê giran yê serê Rayberê PKKyî Abdullah Ocalanî ameyo destpêkerdiş ercna û vat: “Ganî lezkî no tecrîd peynî bibo û seba çalakîyê zîndanan peynî bibê, nê waştişî bêrê qebûlkerdiş.”

 

Tecrîda giran yê serê Rayberê PKKyî Abdullah Ocalanî de dewam kenê û bi 39 aşmî yo tu agahî Abdullah Ocalanî û tepişteyê bînan ra nîna girewtiş. Tepişteyê sîyasî yê zîndanê vakurê Kurdistanî û Tirkîya de çarçewaya kampanyaya mîyanneteweyî ya “Abdullah Ocalanî rê azadî, seba problemê kurdî çareseriya demokratîke” de, 27ê Teşrîna Peyêne 2023yîne de dest bi grevê vêşanîye yê bêdem û dore kerdibî. Tepişteyê sîyasî çalakîya xo 4ê Nîsane ra nêvejîyayîşê pêvînayîşê rî bi rî, redkerdişê pêvînayîşê bi telefonî û bi çalakiya nêvejîyayîşê dadgehan dewam kenê. 

 

Îdarekara Komeleya Heqê Merdiman (ÎHD) ya Colemêrgî Pinar Yilmaz, tecrîdê serê Rayberê PKKyî Abdullah Ocalanî û binpaykerdişê heqan yê zîndanan erjna.

 

‘Îşkence keyeyan rê zî yeno kerdiş’

 

Pinare derheqê tecrîdî de wina qal kerd: “Abdullah Ocalan û tepişteyê kîşte ci de binê şertên giran de yê. Şertê înan her ke şinê giran benê. Îmrali de her tim 3-6 aşman reyke cezaya dîsîplînî yena dayîş. Her tim cezaya dîsîplînî birnenê. Gelo zîndan de çi kenê ke hende ceza yena birnayîş. Tenê tepişteyan ser nê  keyeyanê înan rê zî tecrîd ca anê. Seba tecrîdî nika Tirkîya de çalakî est ê. Tepişteyan rê îşkence keyeyanê înan ra zî yeno kerdiş."

 

‘Caardişê keyfî pêro zîndanan de est ê’

 

Pinare vat, pêro zîndanan de caardişê keyfî yenê kerdiş û tepişteyî cezayê dîsîplînî reyde yenê rî bi rî. Seba demokratîkbîyayîşê Tirkîya zîndananî nokteyê esas ê. Demokrasî nêkewo zîndanan, do nêkewo tu cayê welatî. Ganî demokrasî bêro Îmrali û pêro zîndanan. Ganî lezkî no tecrîd peynî bibo û waştişê tepişteyan ca bîyarê. Waştişê ma zî oyo ke no tecrîd peynî bibo.”