Elfazî Toral

 

STENBOL - Pîreboka Kampusî ra Eylul Kara derheqê kampanyaya pedanê hîjyenîkan û tampon yê bê pere sero qisey kerd û vat: “Waştişê ma oyo ke ped pêro şaredarîyan de zêdeyêr bêrê vilakerdiş. Ganî cinî hîna asan xo biresnê ped û tamponan. Ez venga wayîrvejîyayîşê kampanyaya pêro cinîyan kena.”

 

Seba krîzê ekonomî yê netîceyê polîtîkayê ekonomî yê ke îqtîdar pê ano de, hetêk ra feqîrîya cinîyan, heto bîn ra zî qetilkerdişê cinîyan zêde beno. Faturayê krîzî cinî û wendekaran rê yeno birnayîş. Pedê hîjyenîkî û tamponê ke lazimîyê sereyîn ê cinîyan de ganî hetê dewlete ra biameyîne peydakerdiş, seba vayîbîyayîş û bacê ke yenê dayîş xoresnayîşê înan hacetê zehmet benê. Pîrebokê Kampusî seba cinî xo biresnê na kampanyaya ‘lûks nîyo lazimîyê sereyîn o’ da destpêkerdiş.

 

Pîreboka Kampusî ra Eylul Kara derheqê kampanya ke dayî destpêkerdiş de JINNEWSî rê qisey kerd.

 

‘Têhetameyîşê cinîyan seba ma zaf muhîm o’

 

Eylul Kara dîyar kerd ke cinîyan reyde probleman munaqeşe kenê û wina vat: “Têhetameyîşê yewbînan û rêxistinbîyayîşê cinîyan seba ma muhîm o. Ma unîversîteyan sey wareyê azad vînenê la xeylêk problemî ma pawenê. Hemverê teda, hêriş, desteştişî û zayendperestî wargehan rêxistinbîyayîş muhîm o. Ma cinî vera nê têkoşîn kenê. Yew problemo pîl zî feqîrîya reglî yo.”

 

‘Luks nîyo lazimî yo’

 

Eylule dewam de wina vat: “Ma seba pedê bê pere kampanya da destpêkerdiş. Bi nameyê ‘luks nîyo, lazimî yo’ ma da destpêkerdiş. Ma 2022yîne de zî na kampanya dabî destpêkerdiş û ped û tamponan ra se ra 18 bac ma ra ameyîne girewtiş. Ma hemverê na de kampanya da destpêkerdiş. Ma bi pankartêk pîl ê pedî kuçeyê Îstîklalî de rayîr ra şîyî. Îzmîr û Eden de zî ma vengê xo berz kerd. Ma do ancî kampanyaya xo dewam bikerê.”

 

Ganî aşîya HPV pêro kesan rê bêro pirodayîş

 

Eylule vat ganî aşîya HPVî pêro kesî bidê xo ro û vat: “3 Dozê ci 2500 TL yê. Na ma kanserî ra xelisnena. Nê semedî ra ma aşîya HPVî kerd kampanyaya xo. Ganî her kes xo biresno ped û tamponan. Waştişê ma oyo ke bê pere bo û her kes bieşko xo biresno. Ez venga pêro cinîyan kena ke wayîrê kampanya vejîyê.”