AMED - Avûkata tepişteye Merve Nûr Dogan ke tecrîdê girankerde yê Îmraliyî protesto kerdêne, dimayê qerarê dadgehe, bi zor ardî odaya SEGBÎSî. Merve, pawitiş nêkerd û cezaya ke ci rê dîya bi sloganê “Bijî Serok Apo” protesto kerd. 

 

Avûkata Baroyê Amedî Merve Nûr Dogan bi sebebê ke fotografê aye bi PKKyîjê ke 3yê teşrîna verêne 2020ine de çoltarê qezaya Licê ya Amedî de dinyaya xo bedelnayî reyde est o, 7ê teşrîna verêne 2020ine de ameye destbendkerdiş û dima ra ameye tepiştiş. Roniştişê qerarî yê dewaya Merve ameye kerdiş. Roniştiş 10ine Dadgeha Cezaya Giran ya Amedî de ameye kerdiş. Avûkata Merve, Adîle Salman û Servet Ozen û Serekê Baroyê Amedî Nahît Eren tewrê roniştişî bîyî. 

 

Merve ya ke zîndanê Cinîyan ê Tarsusî de yena tepiştiş, vizêr waştişnameyêk nuşt û vat do tewrê roniştişî nêbo. Dadgehe qerar da ke Merve bi zor bîyarê dadgehe û serê Sîstemê Veng û Dîmen (SEGBÎS) tewrê roniştişî bêro kerdiş. Serê nê qerarî ra Merve ewro bi zor ardî odaya SEGBÎSî.

 

Tecrîd şermezar kerd

 

Merve, roniştiş de bi kurdkî qisey kerd û vat ke seba tecrîdê girankerde yê serê Rayberê PKKyî Abdullah Ocalanî qebûl nêkena, qerar dayê ke tewrê roniştişî nêbo. 

 

Dozgerî zî waşt ke Merve bêro cezakerdiş. Avûkatan zî vatî ke nîno qebûlkerdiş ke miwekîla înan bi darê zorî bîyarê odaya SEGBÎSî û no çî binpaykerdişê heqê merdiman o. 

 

Dadgehe, bi îdiayê “endamîya rêxistine” 9 serrî cezaya zîndanî Merve rê birna. Qerar ame dayîş ke rewşa tepişteyî ya Merve dewam bikero. 

 

Merve, cezaya ke ci rê birnaya, bi sloganê “Bijî Serok Apo” protesto kerd.