Elfazî Toral

 

STENBOL- Xebatkarê rojnameyê Yenî Yaşamî pêro nuştox û wendekaranê xo dawetê bernameyê paştdayîşê ke do 2ê hezîrane de pê bîyarê kerd û vat: “Pêwa pêro tedayan ma heta ewro ameyî û ma bi paştdayîş, rêxistinbîyayîş û wendekaranê xo pîl bîyî. Yenî Yaşam hêzê xo şarî rê gêno. Çapemenîya Azade her tim hemverê tarîtî de bîya neynik.” 

 

Rojnameyo Yenî Yaşam 25ê Gulana 2018ine de dest bi weşane kerd û 2ê hêzîrane de do bernameyêk ‘Yenî Yaşam 6 serrîya xo de wendekaranê xo reyde yeno têhet’. Bername do Merkezê Kongre û Kulturî yê Baglarbaşi yê Şaredarîya Uskudarî pê bêro.  Bername do saete 19.00ine de dest pêbikero û bê pere yo. Hunermendê Merkezê Kulturê Mezopotamyaye (NÇM) Baran Bozyel do muzîkjen Kasim Taşdogan reyde vejîyo serê sehne. Pawitoxê heq, rojnameger, hunermend, wendekarî, nuştoxî derheqê şewe de venga paştdayîşî kenê.

 

Hem wendekarî û hem zî nuştoxê Yenî Yaşamî JINNEWSî rê qisey kerdî.

 

‘Ma mîrasê Gurbetellî Ersoze rê wayîr vejîyayî’

 

Vilakerdoxa rojnameyê Yenî Yaşamî Nuda Arici wina vat: “Ma bi rojnameyê Kurdistanî dest bi weşanî kerd. Name bivuryo zî no adet nêvuryayo. Ma do têkoşînê xo her raşteyê cuye de dewam bikerê. Serranê 1990î de vengkerdişê dewan de, demo ke îşkence û teda estbî de Ozgur Gundem estbî. Hema wendekarî bi çimê Ozgur Gundemî Yenî Yaşamî rê ewnîyenê. Ma bi bedelê pîlî ameyî na roje. Gurbetellî çapemenîya kurdî de cayêk muhîm gêna. Bi vindertiş û têkoşînê xo yena zanayîş. Ma mîrasê aye nimûne gênê. Ma mîrasê aye dewam kenê. Ma venga her kesî kenê ke şewa paştdayîşî de şarê ma zî uca de bo.”

 

 

‘Yenî Yaşam adetê çapemenîya azade ra yeno’

 

Nuştoxa Yenî Yaşamî Reyhan Hacioglu zî serra 6ine ê Yenî Yaşamî pîroz kerd û dîyar kerd ke Yenî Yaşamî sey teşeyê cuye gênê dest û wina vat: “Ozgur Gundem yew weşanê adetî yê çapemenîya azade yo. Yenî Yaşam dewamê adetê Ozgur Ulke yo. 2016ine de Ozgurlukçu Demokrasî ame padayîş û verê ci Yenî Yaşam kewt weşan."

 

Ozgur Gundem ra heta Yenî Yaşam

 

Wendekara Yenî Yaşamî Eylem Çîçek Bîlge zî dîyar kerd 30 serrî yo rojnameyê çapemenîya azade wanenê wina vat: “Ez 6 serrî bîya o wext. Pîyê mi rojname girewtêne. A roje ra dima ez wayîrê ci vecêna. Ma wendekarê ci yê daîmî yê. Ma her tim taqîb kerdêne. Bi 30 serrî yo ma rojnameyê xo yê bi erce ard nê rojan û ma tîya ra tepîya xî wayîr vejîyê.”