DÊRSIM - Tifaqê DEM Partî xebatê xo yê weçînayîşî yê ke do 2ê hezîrane de Perî de bêrê kerdiş, bê mabên keno. Bîrsen Orhan û Humeyra Tosun Yegîn derheqê muhîmîyê weçînayîşê ke do Perî de bêrê newekerdiş de qisey kerdî û venga wayîrvejîyayîşê îradeyî kerdî. 

 

Bajarokê Perî yê Mazgîrtî yê Dêrsimî de do weçînayîş 2ê hezîrane de bêrê newekerdiş û weçînayîşan reyde demêk kilm mend. Partîya Têduştî û Demokrasîyî yê Şaran (DEM Partî) 16ê Gulane de start da xebatanê xo. 16ê Gulane de heta nika DEM Partî xebatanê xo namzetanê xo Nacîye Aslan û Orhan Çelebî reyde dewe bi dewe, taxe bi taxe kena. Namzetî bi taybetî seba çareserîya problemî rayîr û awe yê bajarokî, seba berzkerdişê îstîhdamî sozê xo danê. Hemşaredara Dêrsimî Bîrsen Orhan û îdarekarîya DEM Partî ya Dêrsimî Humeyra Tosun Yegîn qisey kerd û dîyar kerd ke ganî şar wayîrê îradeyê xo vejîyo û wina vat: “Ma venga pêro şarê Perî kenê. Seba wayîrê têkoşîn, îrade û keda xo vejîyê wa şêrê serê sindoqan.”

 

‘Bidestkerdişê weçînayîşî seba muhîm o’

 

Bîrsene da zanayîş ke weçînayîşê 31ê Adare de DEM Partî 78 şaredarî bi dest kerda û vat: “Nika di şaredarîyê ke ganî bigîrê est ê. Ma ewro Perî de yê. Coş û bendewarîya şarî zaf pîl a. Seba Perî no weçînayîş zaf muhîm o. Seba ke no di demî yo îradeyê şarî yeno xespkerdiş. Qeyûman tîya tenê talanê ekonomî nêkerdê, yê kulturî zî kerdî. Hêrişê  destkewtişê cinî û ciwanan kerdî. Nê bajarokê qijî de tu xebate nêameya kerdîş. Şarê Perîye nê çî eşkera  vano. Şarê Perî texrîbat ma ra vano. Seba ke no weçînayîş ma rê zaf muhîm o. 31ê Adare de şarê Dêrsimî wezîfe û berpirsyarîyêk da ma. Ma do nê  berpirsyarî şarê Perî reyde paştdayîş de bê. Ma nê baş zanê. Do şarê Perî wayîrê îradeyê xo vejîyo. Seba ke no ca DEM partîye yo û do ê DEM Partîye bimano.”

 

‘Ma Wan nêda ma do Perî zî nêdê’

 

Bîrsene dewam de wina vat: “Sozê ke amebî dayîş rant û talan bî. Ez venga pêro kesî kena ke 2yê hezîrane de şêrê serê sindoqan. Ma zî şarê Perî zî baş zanê. Do şarê Perî cewab bido îqtîdarê AKP-MHPyî. Wa şikê kesî çinbo. Ma senî Wan teslîm nêkerd, ma do Perî zî nêdê. Ma venga pêro şarê xo kenê. Şima ça benê wa bibê bêrê rayanê xo bişuxilênê. Perî bê DEM Partîye, DEM Partî bê Perî nêbena.”

 

‘Ma wayîrê keda xo vejîyê’

 

Humeyra Tosun Yegîn zî wina vat: “Wayîrvejîyayîşê îradeyî xeylêk muhîm o. No bajarok dewan ra pê yeno. Coka ma xebatanê xo tax bi taxe, keye bi keye dewam kenê. Weçînîtoxê ke teber de ciwîyenê est ê. Ma hewl danê nînan bivînê. Ma wazenê yê aydê xo newe ra bigîrê. Hîn propagandayê sîyayî yenê kerdiş. Vanê do newe ra qeyûm bêro. Ganî qesawetê ma çinbo. Xoverdayîşê Wanî nê vet werte. Seba nê ganî ma wayîrê îradeyê xo vejîyê. Ma veng pêro şarê Perî kenê ke wayîrê keda xo vejîyê û şêrê serê sindoqan.”