WAN - Dayîkê ke bi waştişê "Edalet bîyare, huqûqî ca bîyare" laçekê xo yê spî verê Wezaretê Edaletî de dayî ro, wina vatî: "Heta tecrîdê serê Rayberê ma nêwurzo do no zulm nêqedo. Seba aştîye û aramîye ganî pêvînayîşê lezkî Rayberê ma reyde bikerê."

 

Bi 3 serrî yo Rayberê PKKyî Abdullah Ocalanî ra agahî nîna girewtiş. Çalakîya "Seba Birêz Abdullah Ocalanî azadî meseleya kurdî rê çareserîya sîyasî" zî dewam kena. Tecrîd hem zîndanan de û hem zî xeylêk cayan de yeno şermezarkerdiş. Vizêr zî Dayîkê Aştîye yê Geverî û Wanî Anqara de verê Wezaretê Edaletî de hemverê tecrîdî û seba azadîya Abdullah Ocalanî laçekê xo yê spî dayî ro. 

 

'Çîyê ke heqê ma yê ma tehdîd kenê’

 

Dayîkê Aştîye ya Geverî Fatma Temel, da zanayîş ke pêwa astengîyan zî ê waştişê xo anê ziwan û wina vat: "Ma wazenê hesab bipersê, gelo çira zîndanan de zulm tutanê ma rê kenê. Vanê, ma edaletê dînî kenê. Ma vînenê no edalet seba kurdan çin o. Çike  çiqas ma edalet wazenê tewr zêde zulm û teda ma rê yeno kerdiş. Ma tehdîd kenê û vanê ma qeyûman tayînê şaredarîyan bikerê. Bi çîyê heqê ma yê ma tehdîd kenê. Wazenê ma hemverê  zulmî de bêveng bimanê. La ma do cigêrayîşê edaletî dewam bikerê."

 

'Ma wazenê Rayberê xo reyde pêvînayîş bikerê'

 

Kadrîye Nilli zî wina vat: "Ma wazenê Serekê ma vejîyo. Ma wazenê ey bivînê. Ma nêwazenê tutê merdimanê bînan şehîd bikewê. Ma aştîye wazenê. Ma nêwazenê tutê ma bikewê zîndanan. Ma do Wezaretê Edaletî ra vajê ma wazenê Serekê xo reyde pêvînayîş bikerê."

 

'Do tutê ma senî sey înan bifikrîyê?'

 

Merdimanê tepişteyan ra Emine Atak zî wina vat: "Ma hêvîye edaletî yê. La tu edalet nêame. Kênaya mi zîndan de ya labelê bi hîrê aşmî yo, ma tu xebere ci ra nêgînê. Qey merdimê înan, tutê înan çin ê? Tutanê ma ra vanê şima do sey ma bifikrîyê. Do senî tutê ma sey înan bifikrî yê? Ê senî eşkenê fehmêk wina zulm keno, qebûl bikerê?”

 

 

'Yewin çareserî wedaritişê tecrîdî yo'

 

Emîne da zanayîş ke Îran zî tutanê kurdan qetil keno la aqûbetê înan werte de yo, ma dî senî qeza de merdî. Emîne wina vat: "Do tu zulm bê bedel nêmano. Ma reyke bîn veng danê. Sebebê zulmê serê tutanê ma tecrîdê serê Serokatî yo. Heta tecrîdê serê Rayberê ma nêwurzo, no zulm nêqedêno. Seba  aştî û aramîye ganî pêvînayîşê demildest Rayberê ma reyde bêro kerdiş.”