ANQARA - DEM Partîye seba wedaritişê cezaya muebbetê girankerde pêşnîyazqanûnî da meclîs. 

 

Serekwekîlê Koma Partîya Têduştî û Demokrasîyî yê Şaran (DEM Partî) Gulistan Kiliç Koçyîgît û Sezaî Temellî, seba wedaritişê cezaya muebbetê girankerde ke tepişteyî heta peynîya emrê xo zîndan de manenê, pêşnîyazqanûnê Serekîya Meclisî. Pêşnîyazqanûnî de ame dîyarkerdiş ke madeyê “Demê nê cezayî de bi tu hawayî mabêne nîna dayîş" beno ke tepişteyê nêweşî nêrê tedawîkerdiş û rayîr ver bi mergê înan akeno.

 

Pêşnîyazqanûnî de ame dîyarkerdiş ke cezaya muebbetê girankerde serra 2001ine de vera cezaya dardekerdişî ameya sazkerdiş û wina vat: "Na ceza, cezaya merdişî yê demî reyde ameyo helênayîş o." Sewbîna ame vatiş ke na ceza reyde “heta mergî hucreyê yewkesî de yenê girewtiş" û na ceza sey bêmerdimayî ameye ercnayîş.

 

'Tepişteyê nêweşî seba na ceza nêeşkenê tedawî bivînê’

 

Dewam de ame dîyarkerdiş kesê ke na ceza înan rê ameya birnayîş, eke tepişteyê nêweş bê û ATK rapor bido zî cezaya înan nîna taloqkerdiş. Ame dîyarkerdiş ke tepişteyê nêweşî semedê na ceza nêeşkenê tedawî bibê û no zî beno sebebê merdişê înan.

 

Qerarê seba Abdullah Ocalanî ame vîrardiş

 

Sewbîna qerarê Dadgeha Heqê Merdiman a Ewropayî (DMME) ke cezaya muebbetî ê giran bê heqê veradayîşê bişert sey binpaykerdişê heqê hêvî ercneno, ard vîr. Ame vatiş ke nê qerarî zî DMMEyî de 18ê adara 2014ine de seba Rayberê PKKyî Abdullah Ocalan dabî. Serekwekîlan vatî ke DMMEyî seba cezaya muebbetê girankerde pêşnîyaz Tirkîya rê kerdo ke mekanîzmayêk rayîr dano tehlîye bêro awankerdiş.

 

Wa cezaya muebbetê girankerde bêro wedaritiş

 

Peynîya pêşnîyazqanûnî de zî ame waştiş ke cezaya muebbetê girankerde bi temamî merîyet ra bêro wedaritiş.