RIHA - Cinîyê Curnê Reşî yê vernîya weçînayîşê ê aşma hezîrane de reyna bibo de qisey kerdî û dîyar kerdî ke çîyo ke bîyo nêheqî yo û vatî ê do bi hawayêkê xurt wayîrê rayanê xo vejîyê.

 

Qezaya Curnê Reşî ya Rihayî de do 2yê Hezirane de weçînayîşê îdarekarîyê herêmî reyna bibo. Namzetê şaredarîye yê Partîya Têduştîye û Demokrasî (DEM Parti) Garip Yeşil û Serhan Paydaş zî çarçewaya xebatê weçînayîşî de tu keyeyêk nêşîyê nêverdayê. Dimayê qerarê reynakerdişê weçînayîşî qeymeqam sey qeyûm tayînê şaredarîya Curnê Reşî ame kerdiş. Cinîyê Curnê Reşî ke ma mîkrofonê xo dergê înan kerd, nêrazîbîyayîşê xo ardî ziwan û prosesî ercnayî.  

 

'Çîyo ke şarê kurdî rê ameyo kerdiş zulmêk pîl o'

 

Welatijan ra Adalet Salici, çîyê dimayê weçînayîşê 31ê Adare ard vîr û wina vat: "Dinya alemî nêheqîyê ke ameyî kerdiş, şaşîyê ke ameyê kerdiş dîyî. Na rewşe tu kes qebûl nêkeno. Çîyo ke şarê kurdî rê ameyo kerdiş, zulmêk pîl o. Şarê kurdî nê qebûl nêkenê, do qebûl nêkerê zî. Kesê ke verê rayê xo nêdabî DEM Partîye zî do na rey bidê DEM Partîye. Çike înan zî nêheqîyê ke ameyê kerdiş dî. Do newe ra weçînayîş bêro kerdiş û ma do ser bi kewê. Do partîya ma ser bikewa."

 

'Seba aramîye ma vanê DEM Partîye'

 

Newroz Karakeçili dîyar kerd ke seba aramîye ê do raya xo bidê DEM Partîye û vat: "Ganî şaredarî şarî rê xizmet bikero. Ganî hetkarîya feqîran bikera. Wa her çîyê başî bikerê û merdiman biewnê."

 

'Oyo ke ê ma bi wa ancî bibo ê ma'

 

Zeynep Onuz zî da zanayîş ke înan qeçînayîş qezenc kerdibî labelê oyo ke ameyo kerdiş nêheqîyêk pîl o û vat: "Înan bi xo rayanê xo veşnayî. Labelê bîro ke kolnabî, ê bi xo kewtî. Heqê ma yo ma do ancî bigîrê. Ma do bi ciwananê xo hemverê înan de vinderê. Oyo ke ê ma bi do ancî bibo ê ma."

 

'Waştişê ma xizmet o'

 

Zeynepe dîyar kerd ke ê xizmet wazenê û wina vat: "Taxê pakî û mektebî heqê ma yê. Wa seba şarê  Curnê Reşî xizmet bikerê. Ma seba tut û ciwananê xo vanê, DEM Partî. DEM Partî ameyoxê her kesî yo. Çike her kesî qebûl keno. Kurdî, tirkî, lazî... Pêrûnan qebûl keno. Coka ma vanê, DEM Partî."