Oznûr Deger

 

MÊRDÎN - Dayîka Aştîye Besna Gunay çalakîya "Peynîya tecrîdî bîyarê" ercna û vat, "Ma do heta dilopê gonîya xo ya peyîn pey tutanê xo de bê. Wa her kes wurzo serê lingan. Wa destê xo bidê yewbînan û edalet biwazê." 

 

Tepişteyê sîyasî yê zîndanê Tirkîya û Kurdistanî 27ê Teşrîna Peyêne 2023ine de bi waştişê “Abdullah Ocalanî rê azadî û problemê kurdî rê çareserîya sîyasî” dest bi grevê vêşanîye ya bêdem û dore kerdibî. Tepişteyan çalakîya xo dimayê 4ê nîsane açarnayî çalakîya nêvejîyayîşê pêvînyîşê keyeyî reyde û nêvejîyayîşê dadgehan. Merdimê tepişteyan û Dayîkê Aştîye zî Nobeda Edaletî ke bi eynî waştişî dest pêkerdibî açarnayî çalakîyê cîya. Çarçewaya nê çalakîyan de her rojê Dişem, Çarşem û Îne verê awanîyê AKPyî, Wezaretê Edaletî û zîndanan de eşkerayîya çapemenîye yenê dayîş û azadîya Rayberê PKKyî Abdullah Ocalanî û pêro tepişteyê sîyasî wazenê.

 

Dimayê çalakîya Nobeda Edaletî ke merdimê tepişteyan û Dayîkê Aştîye bi eynî waştişî Mêrdîn de dewam kerd, çarçewaya vurnayîşê çalakî de keye û Dayîkê Aştîye roja îne verê awanîya AKPyî ya Mêrdînî bi sloganê, "peynîya tecrîdî bîyarê" çalakîya xo açarnayî eşkerayîya çapemenîye. Dayîka Aştîye ke eynî wextî de yew dayîka tepişteyan a Besna Gunaya ke bi aşman nobeda Edaletî girewt û çalakîya "peynîya tecrîdî bîyarê" ke her hewte verê awanîya AKPyî yeno organîzekerdiş de ca gêno, çalakî ercna.

 

'Ma waşt tecrîd bêro peynîkerdiş'

 

Besna ke lajê aye 25 serrî yo zîndan de yo, bi silamkerdişê pêro tepişteyan dest bi qiseykerdişê xo kerd. Besna ard vîr ke grevê vêşanîye yê tepişteyan bi aşman dewam kerd. Besnaye bale ant serê Nobeda Edaletî ke dimayê çalakîya tepişteyan bi eynî waştişî dest pêkerd û vat, “Ma venga Wezaretê Edaletî kerd û waşt tecrîdê serê tutanê ma û serokê me bêro peynîkerdiş. Serekê ma, serekê pêro dinya yo. Eke o azad bibo, do pêro dinya boyêke bigîro. Ma bi Nobeda Edaletî 3 aşmî yo seba pêro tepişteyanê xo azadî waşt."    

 

'25 serrî yo ez verê berê zîndanî de ya’

 

Besna venga wezîrê Edaletî kerd û waşt peynîya tecrîd û polîtîkayê şerî bîyarê û dîyar kerd ke pêro dayîkê aştî edalet wazenê. Besna vat, “Ma wazenê tecrîd tewr lez peynî bibo. Ma wazenê tutê ma zî sey tutanê bînan biciwîyê. Ma nêwazenê bi serran zîndanan de bimanê. Lajê mi 25 serrî yo bê sûc zîndan de yo. 25 serrî yo ez verê berê zindanî de ya. Wa tepişteyê ma serbest bêrê veradayîş. Bi taybetî tepişteyî nêweşî lazim o tewr lez bêrê veradayîş. Ma wazenê sey pêro kesê bînan ê dinya biciwîyê. Ma heq, huqûq û edalet wazenê."

 

'Wa her kes destê xo bikerê binê kerra'

 

Besna dîyar kerd ke her kesê wayîrê wicdan û pêro dayîkî ganî tepişteyan rê wayîr vejîyê û wina qiseykerdişê xo peynî kerd: "Heta dilopê peyîn ê gonîya xo ma do pey tutanê xo de bê. Ma do têkoşîn dewam bikerê. Wa her kes wurzo serê lingan. Dest bido yewbînan û edalet biwazo. Wa her kes destê xo bikero binê kerra. Biciwîyo xoverdayîşê zîndanan."