Pelşîn Çetînkaya

 

ÊLIH - Cinîyê ke Atolyeya Cinî ya Hêvî ya ke binê banê Şaredarîya Êlihî de kar kenê û serra 2019ine de dimayê ke qeyûm tayîn bî, nameyê ci sey BÎLMEK vurnayî. Cinî hem perwerde vînenê û hem zî pere qezenc kenê. Cinîyan dîyar kerd ke kursê atolye hetê  manewî û hem zî hetê fizîkî ra cuya înan vurnayo. Cinîyan waşt ke pêro kesî beşdar bjbê û xo kurs de aver berê.

 

Êlih de 2019ine de wexto ke şaredarî destê Partîya Herêmê Demokratîke (DBP) de bî taxa Petrolkentî de Atolyeyê Kursê Musnayîşî û Meslegî yê Perwerdeyî yê bi nameyê Hêvî ke dimayê qeyûm tayînî şaredarî ame kerdiş nameyê ci sey  BÎLMEK vurnayî amebî akerdiş û 2021î de berê xo kursîyeran rê akerd.

 

Cinîyê ke şinê BÎLMEK ajansê ma rê derheqê xebatanê xo de qisey kerdî.

 

‘Xorabawerîyê mi zêde bî’

 

Canan Balikçi ya 30 serrî bi di aşmî yo şina atolyeya deştişî yê BÎLMEKî. Canane wina vat: “Demê ewilî mi cesaret nêkerdêne ke ez qeydê xo viraznî. Ez tîya  embazanê xo reyde demê xo weş derbaz kena. Tîya xobawerîkerdişê mi zêde kerd. Sewbîna ez tîya kar bimusî, ez eşkena cayê karî abikerî. Ez venga cinîyan kena ke cinî wina bikerê.”

 

Pêwa tedayan sere nêtewêna

 

Kubra Tunç zî Stenbol ra ameya Êlih û eynî kursî da û wina vat: “Mi ewilî tîya atolya kuafuroyî de dest pêkerd. Dimayê ke mi sertîfîkaya xo girewt, mi dest bi atolyeya deştîşî kerd. Bi di demî yo ez yena tîya û keyfweş a. Demê ewilî pîyê mi destûr nêda. Pîyê mi vat, ‘keyeyê xo de rûşe, tutanê xo rê biewne’. La mi qeydê xo kerd. Dimayê demêk pîyê mi vat, ‘kênaya mi, mi rê nê biderzne.’ Yarîye kerdêne. Ez tutanê xo rê zî çîyan derznena. Hîrê tutê mi est ê. Ez hîrê tenan rê zî derznena.”

 

‘Baş o ke nê kursî est ê’

 

Cinîya bi nameyê Canan zî wina vat: “Baş o ke nê kursî est ê. Cayê ke ma ciwîyenê kursî tay ê. Dimayê ke mi tîya dest pêkerd hêvîya mi gane bî. Ma tîya tenê deştiş û kuafur nêmusenê. Ma her babete de benê wayîrê hişmendî. Mamosteyê ma yenê. Ma rê çîyan vanê. Cinî eşkenê her çî bikerê. Tenê wa ewnîyayîşê xo bivurnê û nêtersê. Demo ke ewnîyayîşê merdiman bivuryo mucîze zî dest pêkenê.”

 

‘Heta cinî keye de rûşê do tedayî zêde bibê’

 

Naciye zî kursê deştişî de şuxilêna wina vat: “Ma hem xebityenê û hem pere qezenc kenê, hem zî tutanê xo rê çîyan derznenê. Ganî cinî binê tedayî ra xelas bibê û serê lingan de vinderê. Wa cinî bixebitîyê û hewl bidê. Eşkenê keyeyê xo de zî kar bikerê. Bi kilmî cinî biwazê eşkenê bixebitîyê. Wa cinî wurzê serê lingan.”

 

‘Dimayê ke ez tîya xebitîyaya cuya mi vurya’

 

Sevgî Polat ke 32 serrî ya û 6 aşmî yo kursê kuaforî de xebityena û wina vat: “Verê cayêk de nêxebityayîne. Eke ez xo aver berî ez o kargerîya xo abikerî. Embazêke mi vatêne ma şêrê kurs. Dima ra ma qerar da ma ameyî. Mêrdeyê mi zî paştdayîş da mi, ez ameya. Roja mi tîya weş derbaz bena. Embaz û mamosteyanê mi reyde wext weş derbaz beno. Ez keyweş a.”

 

‘Wa cinî nêtersê’

 

Necla Denîz Kayi ya 34 serrî zî atolyeya kuaforî ya BÎLMEKî de şuxilêna. Necla wina vat: “Ez şîya mi kursê kuaforî persa. Vatî est o. Mi qeydê xo kerd. Ma perwerdeyî tîya gênê. Wa cinî nêtersê. Ters dişmino tewr pîl o. Ganî cinî bi sebeban vernîya xo nêpadê. Ez ser kewte bîya. Hêvîya mi oyo ke ez xo hîna zêde aver berî.”