Nazlican Nûjîn Yildiz

 

ÎZMÎR - Merdimê tepişteyan Sultan Yagmekan ke seba tecrîdê serê Rayberê PKKyî Abdullah Ocalan û zîndanan bêrê wedaritiş çalakîye de yê, dîyar kerd ke heta ke Rayberê PKKyî ra agahîyêke nêgîrê do hem tepişteyî hem zî merdimê tepişteyan têkoşînê xo dewam bikerê. Sultane vat: “Ma paştîya Birêz Ocalan û tutanê xo de yê.”

 

Rayberê PKKyî Abdullah Ocalan ke zîndanê Îmraliyî de binê tecrîdê giranî de yo, 38 aşmî yo tu agahî ci ra nîna girewtiş û yê tepişteyê bînan ra nîna girewtiş. Sewbîna ame zanayîş ke 6 aşmî qedexeyê pêvînayîşî yê avûkatan ameyo dayîş. Tepişteyê sîyasî yê zîndanê vakurê Kurdistanî û Tirkîya çarçewaya kampanyaya mîyanneteweyî ya “Abdullah Ocalan rê azadî, seba problemê kurdî çareserîya demokratîk” de, 27ê Teşrîna Peyêne 2023ine de dest bi grevê vêşanîye ya bêdem û dore kerdibî. Tepişteyê sîyasî çalakîya xo 4ê Nîsane ra bi nêvejîyayîşê pêvînayîşê rî bi rî, redkerdişê pêvînayîşê bi telefonî û bi çalakîya nêvejîyayîşê dadgehan dewam kenê. Merdimê tepişteyan zî 6ê Gulane de bi eynî waştişî çalakîya ‘veng bidê azadîye’ dewam kenê.

 

Dayîka tepişteyê bi nameyê Firat Yagmekan ke zîndanê Tîpê Fyê Hûmara 2yîn ya Kiriklarî de tepişte yo, Sultan Yagmekan derheqê tecrîdî de qisey kerd û da zanayîş ke tecrîd tesîr serê pêro komelî de kerdo û heta ke agahîyêke Rayberê PKKyî Abdullah Ocalanî ra nêgîrê do têkoşînê înan dewam bikero.

 

‘Waştişê ma wedaritişê tecrîdî yo’

 

Sultane da zanayîş ke waştişê înan wedaritişê tecrîdî yo û wina vat: “Verê zî ma Nobeta Edaletî girewtibî û dimayê ke tepişteyan 4ê Nîsane de qerarêk newe girewtî, ma zî çalakîya ‘veng bidê azadîye’ dayî destpêkerdiş. Tepişteyan tecrîdê serê Abdullah Ocalanî protesto kerdî û nêvejîyenê pêvînayîşan. Bi di aşmî yo nêvejîyenê telefon û pêvînayîşan. Ma rewşa înan nêzanê. Ma nêzanê ke tutê ma nêweş ê, yan senîn ê.”

 

Vindertişê bi qerar ê dayîkan

 

Sultane dîyar kerd ke seba waştişê xo bîyarê ziwan şîyê Anqara, waştişê Wezîrê Edaletî reyde pêvînayîş bikerê û wina vat: “Seba tutanê ma gamêke zî nêameya eştiş. Ma dayîk ê. Kezeba ma veşena. Ma tutanê xo mereq kenê. Ma nêeşkenê keyeyanê xo de roşê. Ma şîyî Anqara. Randevu nêdayî ma. Dayîkê Stenbolî rê seba randevu nêameye dayîş agêrayî. Ma zî randevu waşt. Seba ma persê ‘çira’ bipersê şîyî. Tutê ma seba tecrîdê serê Birêz Ocalanî nêvejîyenê pêvînayîş. Randevu dayî ma. Vatî wa merdimê tepişteyan bêrê. Ma zî şîyî. Ma hîrê tutî şî zerre. Temsîlkarê wezîrî uca de bî. Vatî wezîr tîya nîyo, çi derdê şima est o vajê. Temsîlkar ma goşdarî kerd. Di parlamenterî zî amebî. Ma hîrê dayîkan derdê xo vat. Ma vat çira birêz Ocalan yeno tecrîdkerdiş. Ma vat 6 aşmî qedexeyê newe ameyo dayîş. Ma sebebê nê persa. Ma vat çira zanayîş çin o, çira CPT nêşino Îmrali.”

 

Tepişteyî çalakîya xo de qerardar ê

 

Sultane vat do tepişteyî heta agahî Rayberê PKKyî Abdullah Ocalanî ra bigîrê çalakîya xo dewam bikerê û wina vat: “Ma waştişê xo temsîlkarê wezîrî ra vat. Temsîlkar vat do waştişan wezîrî rê neql bikerê. Ma aştîye wazenê. Dimayê wezaretî ma şîyî serdayîşê Emîne Şenyaşar. Wa tutê ma nêmirê. Wa zîndanan ra cenazeyî nêvejîyê. Yewin waştişê ma aştîye yo. Tepişteyê nêweşî est ê. Ganî bêrê veradayîş. Ma do paweyê edaletê înan nêmanê. Ma do her tim kîşte tutanê xo de bê. Heta ke tutê ma û Birêz Ocalan azad nêbo, ma zî azad nîyê.”

 

‘No tecrîd serê pêro Tirkîya de yo’

 

Sultane dîyar kerd ke tecrîdê Abdullah Ocalanî ser, pêro komelî zî kerdo binê tecrîdî û vat: “No tecrîd serê pêro Tirkîya yo. Ganî hîn wijdan û edalet bibo. Ma dayîk ê. Heta ke game nêro eştiş, ma do kuçeyan de bê. Ça beno wa bibo ma do ruşê. Do çalakîya ma dewam bikera.”