Elfazî Toral

 

STENBOL - Waya Cemîl Kirbayir ke destbendkerdiş de amebî vînîkerdiş, Fatma Kirbayir hema aqûbetê birayê xo nêmusa, 14ê Gulane de dinyaya xo bedelnaye. Embaza aye ya têkoşînî Leman Yurtsever da zanayîş ke ê do cigêrayîşê edeletî ke  Fatma verdaya dewam bikerê û heta netîce bêro girewtiş do têkoşîn bikerê.

 

Dayîka Berfo yew sembolê têkoşînî Dayîkê Şemeyî bî û 33 serran seba aqûbetê lajê xo Cemîl Kirbayir têkoşîn kerd. Cemîl Kirbayir dimayê darbeyê 1980î dima destbendkerdişî de ame vînîkerdiş. Cemîl Kirbayir 13ê êlule 1980î de keyeyê xo yê dewa Okçu ya qezaya Golanî ya Erdexanî ame destbendkerdiş û bi îşkence ame qetilkerdiş. La keyeyî xo nêresna cenazeya ey. Berfo Kirbayir 33 serrî seba lajê xo  têkoşîn kerd û 21ê Sibata 2013ine de 105 serrî de dinyaya xo bedelnaye. Dimayê aye kênaya aye Fatma Kirbayir têkoşîn dewr girewt û dewam kerd.

 

Fatma Kirbayir ke bi serran têkoşînê dayîka xo dewam kerd, her hewte Meydanê Galatasarayî de waştişê xo ard ziwan. Fatma Kirbayir zî sey dayîka xo bê ke aqûbetê birayê xo bimusa 14ê Gulane de dinyaya xo bedelnaye. 

 

Embaza aye ya têkoşînî yew Merdimê Şemeyî Leman Yurtsever JINNEWSî rê qisey kerd.

 

29 serran têkoşîn kerd

 

Lemane da zanayîş ke Fatma 29 serrî Dayîkê Şemeyî reyde têkoşîn kerd û sey dayîka xo heta peynîya emrê xo xo ver daya. Lemane wina vat: “29 serrî pêwa Dayîkê Şemeyî ca girewte. Her tim ameye Galatasaray. Sey Berfo Kirbayir bi dejê xo koçê peyîn kerd. Hemverê nêweşîyan têkoşîn kerd. Wexto ke nêweşe bî zî xo ver da. Merdişêk rew bî. Nê prosesî de dayîk û pîyê ke dinyaya xo bedelnayî, wayê û birayê ke dinyaya xo bedelnayî estbî. Fatma zî sey dayîka xo vernî ke edelet bivîna dinyaya xo bedelnaye.”

 

Fatma têkoşînê xo dostanê xo rê verda

 

Lemane dîyar kerd ke Fatma reya peyîn zaf waştêne şêro Meydanê Galatasarayî û wina vat: “Embaza ma, dosta ma bî. Ma têkoşînê ke Fatma verdayo dewr girewt. Ma do hem têkoşînê Fatma hem zî yê dayîkê bînî ke dinyaya xo bedelnayê bi qerarêk pîl dewam bikerê. No têkoşîn nesl bi nesl do dewam bikero. Heta edelet pê bêro ma do têkoşîn bikerê. Fatma vernîya ke dinyaya xo bi bedelno vat, ‘ez bawer kena ke şima do nê têkoşînî dewam bikerê’. Heqdar bî. Seba ke ma zî bi israr ê. Ma do têkoşîn dewam bikerê.”

 

Sozê seba dayîka Berfo ame dayîş ca nêardî

 

Lemane dewam de wina vat: “Serekkomarê demî Tayyîp Erdogan 2011ine de Dayîka Berfo reyde pêvînayîş kerd. Dosyayêke taybet ameye amadekerdiş. Komîsyonêk taybet ame awankerdiş. Dewlete reya ewil sûcê hedîseyê vînîbîyayeyan qebûl kerd û soz da. La çi heyf sozê ke ameyê dayîş ca nêameyî. Meydanê Galatasrayî cayê pêvînayîşê vînîbîyayeyan reyde yo. No ca cayê pêro kesan o. Kesê ke destbendkerdişî de ameyî vînîkerdiş gorêk ci yê wina çin o. Ma uca sey gor vînenê. Coka Meydanê Galatasarayî merkezê vîrî yo. Ma heta ke netîceyêke nêgîrê têkoşîno xo dewam bikerê. No têkoşîn do seba vînîbîyayeyan dewam bikero.”