Oznur Deger

 

MÊRDÎN - Nuştoxa kurde Leyla Saraç ke zîndanê Tîpê Myê Bayburtî ra tahlîye bîye, înfazê aye veşabî û ancî amebî tepiştiş. Dimayê ke înfazê aye qedîya zîndanê Şakranî yê Cinîyan ra tahliye bîye. Leyla bale ant serê şertê zîndanî û vat: “Zîndanî cayê îşkenceyî yê. Zîndanan de xoverdayîşêk pîl est o. Ganî her kes wayîrê têkoşînê zîndanan vejîyo û veng bidê vengê înan.”

 

Yew caardişê îqtîdarî yê zîndanan de veşnayîşê înfazan o. 2021î heta nika bi qerarê Heyetê Îdarî û Taqîbkerdişî, bi sebebê cîya înfazê tepişteyan yeno veşnayîş. Nuştoxe û şaîra kurde Leyla Saraç ke 5 serrî û 8 aşmî tepişte mende û 25ê teşrîna verêne 2021î de ameye veradayîş, 14ê Hezîrana 2022ine de bi sebebê ‘înfazê aye ameyo veşnayîş’ ancî ameye tepiştiş û berdibî zîndanê Cinîyan ê Şakranî yê Îzmîrî.

 

Leyla 30ê Nîsane de zîndanê Cinîyan ê Şakranî ra tahlîye bîye. Leyla polîtîkayê zîndanan ercna.

 

‘Wexto ke vengê ma ameyîne eşnawitiş cipersayîşê dîsîplînî dest pêkerd’

 

Leyla wina vat: “Zîndanê Şakranî yew herêmê pîlot o. Odayê ma teberê îradeyê ma yenê vurnayîş û vengkerdiş. Dima ra raşteyê hempar werte ra ameyî wedaritiş. Ma nêeşkayîne vejîyê sohbet û spor. Ma kerdî binê tecrîdê giranî. Serrê peyînan de no zaf  giran bî. Ma embazanê xo qet nêdîne. Vengê înan zî nêameyîne ma. Hîrê odayê ma estbî. Ê diyîne de embazê ke muebetê giran înan rê amebî birnayîş mendêne. Ma înan qet nêdîne. Reyan wexto ke ma şîne nêweşxane ma tesadufî yewbînan dîne. Nê netîceyê polîtîkaya tecrîdî yê. Wexto ke ma nê vatêne, ma telefon de keyeyan ra vatêne, resayîne çapemenîye labelê na rey cipersayîşê dîsîplînî ameyîne akerdiş.”

 

‘Vatişê ‘derbazî bo’ zî bîne sebebê cipersayîşî’

 

Leyla dewam de wina vat: “Pêvînayîşê telefonî qawişe de kulubeyê ronayîşî de pê yenê. Wexto ke telefonî xira bibê, no heq peyser nîno dayîş. Wexto ke ma telefon de çîyêk bivatêne, binpaykerdişê heqan bivatêne ameyîne birnayîş. Cipersayîş ameyîne akerdiş. Bi sebebê cîya telefonî ameyîne birnayîş û cipersayîş ameyîne akerdiş. Embaza ma Hatîce Çalihan cezaya aye qedîyabî û nêamebî tahliyekerdiş 6 aşmî amebî taloqkerdiş. Tahliyeyê embaza ma Rozerîn Kalkan 11 aşmî ame taloqkerdiş.”

 

‘Yê ke tewrê çalakî bîne 11 rojî cezaya disîplînî înan rê ameyîne birnayîş’

 

Leylaye çalakîyê ke nika zîndanan de dewam kenê zî wina vat: “27ê Teşrîna Peyêne ra heta nika seba şikinayîşê tecrîdî zîndanan de çalakî estbî. 4ê Nîsane ra nata resa sewîyeyêka bîn û qerarê boykotkerdişê dadgehe, pêvînayîş û telefonan ame girewtiş. Zîndanan de tecrîdêk giran est o. Embazê ma tewrê çalakî bîne 11 rojan cezaya hucreyî dayîne. Heyetê Îdarî û Taqîbkerdişî bi sebebê cîya înfazan veşnenê. Nêwazenê kesî bêrê veradayîş. Seba nê zî xeylêk polîtîkayî yenê kerdiş. Heyet newe ra sey dadgehe keweno dewre. Xeylêk cezayê hucreyî yenê birnayîş. Wazenê bi nê tedayan tepişteyan bêveng bikerê.”

 

‘Ganî her kes veng bido vengê zîndanan’

 

Leyla tewr peyîn wina vat: “Tepişteyî şertê bêhuqûqî de manenê. Tu kes cayêk wina de cuye heq nêkeno. Odayanê qijî de manenê. Merdimî nêeşkenê hîrê gaman ci de bierzê. Cayê manenê de firaqanê xo şonê, destanê xo şonê, sereyê xo şonê. Pêro lazimîyê xo uca de kenê. Di embazê ma şertê giranan de Şakran de ciwîyenê. Ganî her kes hemverê nê caardişê zîndanan de vengê xo bikerê yew. Ganî tu kes hemverê nê de bêveng nêmano. Ganî tepişteyan tenê nêverdê.”