Melek Avci

 

ANQARA- Verfeka TJK-E Ayten Kaplan derheqê kampanyaya Ewropa de yeno kerdiş sero qisey kerd û vat: “Ma şarê xo, serekîya xo nêkenê qurbanê berjwendîyê sîyasî. Demê kaykerdişê qertê kurdan qedîya yo."

 

Çarçewaya kampanyaya "Abdullah Ocalanî rê azadîya fîzîkî û problemê kurdî rê çareserî" de her çar hetê dinya de çalakî yenê kerdiş. Ewropa de zî çarçewaya hemleyî de kampanyaya "Hezar cinî hezar vengî" seba CPTyî mektube şirawitî. Pêwa nê panelî, munaqeşeyê platforman zî dewam keno. Verfeka TJK-E Ayten Kaplan derheqê hemleyî de û demê neweyî de ercnayîş kerd.

 

*10ê teşrîna verêne 2023ine de yê hamle ameyo destpêkerdiş û tevgerê cinîyê kurdî çalakîyî senî pê yenê. Şima eşkenê hîn qal bikerê? 

 

Dostê kurdan nê hemleyî dayî destpêkerdiş. Bi serkêşîya cinîyan yeno kerdiş. Me semîner, panel û rojê wendişî pê ardî. Ma bi nameyê "Azadîya to azadîya ma ya" xeylêk xebatî kerdî. Ma sewîyeya diyîn de kampanyaya "Hezar cinî hezar vengî" da destpêkerdiş. Na kampanya dem derg a. Rojbîyayîşê serekî de me darî ramitî û seba tutan, seba famkerdişê serekî kitabî ameyî nuştiş. 19ê Nîsane de ma têgêrayîşê cinîyê Ewropa kampanya mektube şirawitişî da destpêkerdiş. Seba şikinayîşê tecrîdî ma waştiş kerd û 3 pêşnîyazîyê xo ardî ziwan. 19ê aşme de startê mektube ame dayîş. Do heta 25ê Gulane Almanya de dewam bikero. 27ê aşme de zî do Belçîka de dewam bikero. Welat bi welat do hîrê aşman kampanyaya mektuban bêro rayîr ra berdiş. Almanya de her roje hîrê bajarî şirawenê. Heta nika serê 6 hezarî mektubî Almanya de ameyê komkerdiş. Mektuban de vengdayîş CPTyî rê yeno kerdiş ke berpirsyarîyê xo ca bîyaro. Ma do bi metodê cîya kampanyaya mektuban dewam bikerê.

 

*Şima eşkenê hîn qalê muhîmîyê hamleyî bikerê?

 

Abdullah Ocalan 26 serrî yo Îmraliyî de yeno tecrîdkerdiş, hîrê serrî yo tu agahî ci ra nîna girewtiş.  Goreyê xo tedayan kenê. Wazenê şarê kurdî bipelçiqnê. Pîlbîyayîşê hamleyî reyde şar bi weçînayîşî 31ê Adare ra vat êdî bes o. Hemverê caardişê nêdemokratîk û nêhuqûqî wuştî payan ser. Ma nê zaf muhîm vînenê. Şarî mojna ke bi rayîrê diyalogî çareserî mumkin a. Tirkîya polîtîkayê asîmîlasyonî ra netîce nêgirewta. Tirkîya êdî ameya sewîyeyêke, ganî xo îqna bikera ke no operasyonê sîyasî û leşkerî netîceyêk nêdanê.  Bi taybetî dewaya Kobanê de heqê merdiman û demokrasî ame cezakerdiş. Ma nê qerarî qebûl nêkenê. Şansê çareserî estbî la çi heyf nê nêşuxilnayî. Êdî kes nê polîtîkayê bêdemokratîk qebûl nêkeno.

 

*Ewropa û xeylêk cayê dinya de seba kampanyaye paştdayîş ame. Seba şarê kurdî azadîya Abdullah Ocalanî muhîm a. Seba  kesê ke tewrê nê hemleyî bîyê mihîmî çi yo?

 

Ma paştdayîşê rêxistinê komelê sivîlî, hêzê cinî vînenê. Îmzayan danê. Kesî xoser zî îmzayan danê. Şorişê Rojawanî bi şorişê cinîyan ê Rojhelat bî unîversal. Bi felsefeyê ‘jin jiyan azadî’ pêro dinya de xebate û kampanya yena kerdiş. Ewropa de xeylêk netîce û destkewtişê cinîyan est ê la heta nokte xetimyayî. Sîstemî goreyê xo modelê cinî awan kerdo; cinîya modern, camêrdo terefgîr. Rolê dîyarkerde cinîyan rê yenê ferzkerdiş. Têgêrayîşê cinîyan ê dinya de rêxistinbîyayîşêk cinîyan ke alternatîfan wazeno est o. Ma bi nînan reyde munaqeşe kenê û platforman awan kenp. Hedefê vernî ma awankerdişê Sîstemê Konferansê Cinîyan o. No het ra kampanyaya ma paştdayîş vînena.

 

 

 

*Tewr peyîn ez nê persena, do game yê neweyî bibê bi taybetî hetê Konseyê Ewropayî de şima do çi bikerê?

 

Ma seba înan hîn çîyan fikrîyenê. Aşma hezîrane de weçînayîşê Parlamentoya Ewropayî est o. Namzetê newe, parlamenterê newe, berpirsyarî do vejîyê werte. Parlamentoyê Ewropa de do endamê Konseyê Ewropa zî est ê. Ganî ma nê endaman nas bikerê û têkilî aver berê. Ganî ma waştişê xo înan rê qal bikerê. Ma babeta pêameyê edalet û demokrasî de pêvînayîş bikerê. Demê ma nê kenê zî ganî ma nê bi hêzêk rêxistinkerde bikerê. Ma do xebatê cîya bikerê. Çareserî est a la ganî bi metodê çareserî nêzdî bibê. Ma şarê xo, serekîya xo nêkenê qurbanê berjwendîyê sîyasî. Demê kayê qertê kurdan qedîya yo. Ganî êdî goş bidê waştişê şarê kurdî. Seba ma muxatab dîyar o, serek o.