Rozerîn Gultekîn

 

STENBOL - Teologe Fatma Akdokur vat: “Mîyanê hewldayîşê mîlîter de zehmet o ke Tirkîya paştdayîş bidê Fîlîstîno azad. Eşkerayîya derheqê ke têkilîyê bazirganî ameyê vindertiş zî seba kêmkerdişê reaksîyonê komelî yê. Ganî serkêşê dînî bibê qasidê aştîye.”

 

Dimayê hêrişê HAMASî şerê Îsraîl- Fîlîstînî ke 7ê teşrîna verêne 2023ine dest pêkerd bi 8 aşmî yo dewam keno. Hûmara kesê hêrişê Îsraîlî de dinyaya xo bedelnayî 34 hezar derbaz kerd. Tirkîya ke qaşo hêrîşê Îsraîlî yê hemverê Fîlîstînî qebûl nêkena, bazirganiya bi Îsraîlî reyde 7 aşmî dima bi sînor kerd. Erdogan ke vano Îsraîl herra Fîlîstînî îşxal keno, ê bi xo binê nameyê operasyonê dersînor de herra kurdan îşxal keno. Teologe Fatma Akdokur şerê Îsraîl-Fîlîstînî û helwestê Tirkîya ercna.

 

‘Ma azadîya Fîlîstînî wazenê’

 

Fatma da zanayîş ke hetêk îşxalker o, hetêk zî 100 serrî yo cayê xo ra yeno kerdiş, qirkerdişê pîlî yenê kerdiş û 7ê teşrîna verêne de zî hovîtîyêk pîl yeno kerdiş. Fatma wina vat: “Binpaykerdiş û îşxalkerdişêk eşkera yeno kerdiş. Wazenê Fîlîstînî şarê Fîlîstînî pak bikerê. Ganî her kes wareyê mîyanneteweyî, îradeyê sîyasî û komel seba nê îşxalkerdişî peynî bibê, çi bikewo serê milê înan bikerê. Komel babetê wina de berpirsiyarîya xo anê ca. Sere de DYA û welatê rojawanê Almanya, Fransa, Îngilistan û sewbîna eke paştdayîş nêdê Îsraîlî do Israîl nêeşko uca îşxal bikero. Ganî peynîya ci bîyarê û fîlîstînîjî agêrê serê herra xo û Fîlîstîn azad bibo.”

 

‘Mîyanê hewldayîşê mîlîter de paştdayîş zehmet o’

 

Fatma ercnayîşê xo wina dewam kerd: “Tirkîya bi xo xeylêk herêman de vana têkoşînê terorî reyde û hewl dana komelî îqna bikero. La a zî bi xo hewldayîşê çekdar û mîlîter de ya. Seba nê welatêk pozîsyonêk wina de nêeşkena paştdayîş bida Fîlîstînê azad. Çi beno wa bibo hemverê komelan caardişê têgêrayîşê teberê sînorî rast nîyo. Ez nê tesdîq nêkena.”

 

‘Ganî serkêşê dînî bibê qasidê aştîye’

 

Fatma qiseykerdişê xo wina peynî kerd: “Welat de fikrêk wina awan kenê. Vanê bi şerê yenê kerdiş hawirê aştîye nînê awankerdiş. La na lîstîyêke dewletan a. Wazenê komelî wina dîzayn bikerê. Ganî şar nê kayan xira bikero. Ganî serkêşê dînî bibê qasidê aştîye. Ganî ma îtîraz bikerê ke dîn nêbo hacetê şerî û şîdetî. Ganî dîndarî, serkêşê dînî bibê qasidê aştîye.”