RIHA - Avûkate  Gulistan Paydaş veşnayîşê rayan ê qezaya Curnê Reşî ya Rihayî ke weçînayîşê 31ê Adare de qerarê newekerdişê weçînayîşan ame girewtiş, ercna û da zanayîş ke şikdarî yewî zêdeyêr sûc kerdê û wina vat: “Wezîfedarê sindoqa ma hetê 15 kesî ra rastê hêrîşî ame û bi merg ame tehdîdkerdiş. Nê kesî çira ameyî tahliyekerdiş. Ganî bi 50 serrî ceza biameyîne muhakemekerdiş la dimayê 2 rojan dima ameyî veradayîş.”

 

Curnê Reş do 2yê Hezîrane de weçînayîşî ancî pê bêrê. Avûkate Gulistan Paydaş derheqê çîyê weçînayîşê 31ê Adare de ameyî ciwîyayîş û vat: “DEM Partî serkewt. La AKPyî tehemul nêkerd û sindoqa rayan veşnayî. Qerar ame girewtiş ke weçînayîşî bêrê newekerdiş. Dimayê nê ma seba 2yê Hezîrane dest bi amadekarîyan kerd. Merkezê Ciwanan ê Curnê Reş de rayî ameyî veşnayîş. Goreyê dayeyê û zabitnameyê ma bi 1500 ferqî weçînayîşî girewtibî. La AKPyî îtîraz kerd. Heyetê zî nê îtîrazî qebûl kerd. Nika ma prosesê weçînayîşê bi kedêke pîl kenê.”

 

‘Serekê heyetê sindoqe tehdîd kerdî’

 

Gulistane wina vat: “Dewan de welatîjan tehdîd kerdî. Xeylêk serekê heyetî sindoqan tehdîd kerdî. Xeylêk dewan de rayî girewte nêameyî şuxilnayîş. Çi heyf îradeyê azadî ya şarê ma girewtî. Xêrcê nê muracatê xeylêk hîleyan dayî. Pêwa ke zabitnameyê netîceyê sindoqan destê ma de bîyî, qerarêk wina girewtî.”

 

‘Rayan bi pereyan gênê’

 

Gulistane wina vat: “Ganî hemverê bêusulî ke AKP xebatê weçînayîşî de kenê reaksîyonî bêrê mojnayîş. AKP hewl dano bi pereyan rayan bigîro. Curnê Reş de do parlamenterê ma, embazê OHDyî, hemşaradarê bînî, merkezê pêroyî yê DEM Partî û pêro rêxistinê merkez û qezaya ci kîşte ma de bê. Ma do bi hawayêk xurt wayîrê sindoqanê xo vejîyê. Seba yewine partîya xizmetî bidê şar partîya ma ya.”

 

‘Tenê sûcêk xeylêk sûc ameyî kerdiş’

 

Gulistane wina vat: ”Komêk 150 kesî pê ameyîne sloganî berz kerdî, bi madeyê teqemenî rayî veşnayî. Sindoqa şarê ma ameye veşnayîş. Ma rastê nêheqîyêk pîlî ameyî. Roja 31ê Adare de tenê sûcêk  nê xeylêk sûcî pîya ameyî kerdiş. Veşnayîşê bi çewalan rayan de xeylêk sûcî ameyî kerdiş. Kesê ke ganî bi 50 serrî biameyîne muhakemekerdiş, ameyî veradayîş. Ma nê fam nêkenê. No nîno qebûlkerdiş.”

 

‘Ganî her kes şêro serê sindoqan’

 

Gulistane tewr peyîn wina vat: “Ganî şarê Curnê Reş 2yê Hezîrane de şêrê serê sindoqan û wayîrê îradeyê xo vejîyê. Curnê Reş bajarê ma yo. Curnê Reş DEM Partîye xeylêk hez kerd. Şarê ma ma ra bawer kerd. Rayanê xo bidê DEM Partîye. Şêrê serê sindoqan û bidê îradeyê xo.”