WAN - Cinîyan qerarê Dewaya Kobanê ercnayî û wina vatî: "Cezayan cinîyê kurdî ke hemverê çeteyê DAÎŞî de bîyî û partîya ma rê birnenê."

 

Rojê vîyarte de Dewaya Kobanê ameye vînayîş. Seba sîyasetmedaran bi temamî 407 serrî ceza ameye dayîş. Reaksîyonê pîlî hemverê birnayîşê cezayê sîyasetmedaran ameyî mojnayîş. Hemverê qeraran Kurdistan û Tirkîya de çalakî ameyî organîzekerdiş. Reaksîyonî hemverê qerarê Dewaya Kobanê de ameyî dayîş dewam kenê. Cinîyê Wanî zî dîyar kerdî ke qerarê ke ameyê dayîş huqûqî nîyê û vat, ê do têkoşînê xo dewam bikerê. 

 

'Ma hemverê nêhuqûqiyan vengê xo berz bikerê' 

 

Îdarekarîya Partîya Têduştî û Demokrasî (DEM Parti) Zehra Urar, da zanayîş ke ê cezayê bi hawayêkê nêhuqûqî ameyê dayîş qebûl nêkenê û vat: "Hemverê nêhuqûqiyê bi nê rengî ma do wareyan, kuçeyan de vengê xo berz bikerê. Ma qerarê ke bi hawayêkê nêhuqûqî ameyê dayîş qebûl nêkenê. Cezayan vera cinîyê kurdkî ke hemverê çeteyê DAÎŞî de bîyî û partîya ma rê birnenê. No yeno maneya têkoşîn û bîyayîşê cinîyan qebûl nêkenê. Sere de ma cezaya Figen Yuksekdag rê ameya birnayîş û peynî de cezayê ke pêro embazanê ma rê ameyê birnayîş şermezar kenê. Ma vengê xo berz bikerê."

 

'Ma cezayê ke ameyê birnayîş bi şîdet şermezar kenê'

 

Hemsereka DEM Partîye ya Rêya Armûşê Nurhayat Polat da zanayîş ke no qerar seba bêvengkerdişê mûxalefetî yo û nêhuqûqî yo, qerarêk sîyasî yo. Nurhayate dewam de wina vat: "Nê dewayê sîyasî de têgêrayîşêk bi kîn, hêrs û bi înad est o. Sere de embaza ma Figen Yuksekdag û embazê ma yê bînî bi hawayêkê nêhuqûqî û bê sebeb zîndanan de yenê tepiştiş. Ewro ma qalê normalbîyayîşî kenê, gamê yewin ê normalbîyayîşî edalet o. Bi haweyêkê guncav nêzdîyê edaletî nêbenê."

 

'Qerar azadîya kesan binpay keno'

 

Hemsereka Komeleya Heqê Merdiman (ÎHD) Suzan Erçakan da zanayîş ke qerarê ke yenê dayîş hemverê heqê merdiman ê û wina vat: "Cezayê giran yê tepişteyan rê yenê birnayîş asayîş û azadîya kesan binpay keno. Bi nêzdîyê 8 serran o xeylêk sîyasetmedarî seba falîyetê xo yê sîyasî zîndanan de yenê girewtiş. No qerar sere de heqê sîyasetmedar Selahattin Demirtaş û pêro embazanê ma yê bînî binpay keno. Tu şertê qanûnî zî tîya de çin o. Sîyasetmedarî seba vatiş û çalakîyê xo yenê cezakerdiş. No zî binpaykerdişê azadîya rêxistine yo. "

 

'Wa nêhuqûqî, nênaskerdişê huqûqî werte ra wurzo’ 

 

Suzane tewr peyîn wina vat: “Nê netîceyî bi binpaykerdişê metodê asayîşî pê ameyî. Xeylêk karê usulî bê versûc û mudafiyan ame kerdiş û serê hukmê warê huqûqî de kêmî çin o no qerar ame dayîş. Ma hêvî kenê ke derheqê nê qerarî de demê cigêrayîşê îstinafî nêhuqûqî, nênaskerdişê huqûqî werte ra wurzo. Wa derheqê sîyasetmedarê seba falîyetê xo yê sîyasî yenê cezakerdiş qerarê beratî bêro dayîş. Wa qerarê tehlîyeyê siyasetmedarê tepişte bêro dayîş.”