Mîdye Miqted

 

ŞEHBA - Welatijê kantonê Şehbayî de manenê dîyar kerdî ke dewleta tirkan zîyanê înan bi zanayîş veşnena ke welatijî bêçare bimanê û wina vatî: "Dewleta tirkan zîyanê ma veşnena. Nê reyde wazena reyke bîn verê ma ver bi koçberî abikera la ma bi herra xo girêdayeyê. Do waştişê dişminî yê bi israr do bi xoverdayîşê ma bi ca nêro.”

 

Koçberê Efrînî yê ke bi zêdeyê 6 serrî yo bi zorî koçberê Kantonê Şehbayî bîyê, bi hêrişanê dewleta tirkan de rî bi rî manenê û ambargoyê hukmatê Şamî yê serê welatijê Şehbayî dewam keno. Têkoşînê welatijê Şehbayî yê hemverê hêrişê dewleta tirkan û ambargoyê hukmatê Şamî zî dewam kenê. Dewleta tirkan seba nê têkoşînî bero, pêro tewirê hêrişan serê koçberan de dana dewamkerdiş. Na rey zî zîyanê dewanê Teanî, Nêrebiye û Im Hoşê yê kantonê Şehbayî û eynî demî de zîyanê qezaya Şêrewa dana adirî ver.

 

Multecîyê Efrînî hemverê hêrişê dewleta tirkan yê serê înan û bi xususî veşnayîşê zîyanî, xêr û bereketê înan nêrazîbîyayîşê xo mojnayî û vatî: "Kantonê Şehbayî de seba hêrişê dewleta tirkan û ambargoyê hukmatê Şamî ma mîyanê rewşêke alozî de ciwîyenê. Ma debara xo bi rayîrê ramitişî û çinitişî kenê la seba ke dewleta tirkan bîyayîşê ma tîya bero, her tewir hêrişê ma kena. Ma zî tu wext fek herra xo ra vera nêdanê, heta ma agêrê welatê xo."

 

'Ma fek ramitişî, kar û xoverdayîşê xo ra vera nêdanê'

 

Dilîvan Îbiş kerdişanê dewleta tirkan şermezar kerd û wina vat: "Bi 6 serrî yo ma bi zor serê herra ma ra dayê koçkerdiş û bi 6 serrî yo zî dewleta tirkan hêrişê xo serê ma de dana dewamkerdiş. Bi xususî wextê ma yê nika de, mewsîmê çinitişê zîyanê genimî de hêrişê serê zîyanê ma kenê û zîyanê ma danê adirî ver. Dewleta tirkan bi nê kerdişanê xo hewl dana îradeyê ma bipelçiqna û verê ma zî reyke bîn dana koçberî. La wa dewleta tirkan nêfikrîyo ke ma do fek xoverdayîşê xo ra vera bidê. Ma do karê xo, ramitişê xo dewam bikerê."

 

'Dewleta tirkan zîyanê ma veşnena'

 

Hêvîn Tahir Xelîl hêrişê hemverê zîyanê ke pê debara xo kenê, şermezar kerd û wina vat: "Bi zêdeyê 6 serrî yo ke ma koçê qezaya Şêrewa bîyî. Ê wextî ra ke ma koçber bîyê û heta roja ma ya ewro dewleta tirkan hêrişê xo bi her hawayî serê ma de kena. Ma bi ramitişî debara xo kenê la dewleta tirkan bi hawayêkê sîstematîk bi destê çeteyan hêrişê zîyanê ma, hêrişê ma kena. Hem ma qetil kena, hem zîyanê ma veşnena. Nêwazenê kurdî bi tu hawayî aver şêrê. Her hetî ra hêriş kenê û wazenê destkewtişê ma zî berê. La ma do destûr nêdê. Pêwa şert û mercê xidarî zî ma do xoverdayîşê xo dewam bikerê.”

 

'Ma fek xoverdayîşê xo ra vera nêdanê'

 

Rûken Hesen zî da zanayîş ke dewleta tirkan seba xoverdayîşê înan bero, bi her tewir hêrişan serê înan de kena û vat: "No wext de mewsîmê ramitişî, çinitiş, eşêf, paleyîye yo. Ma zî bi nê çîyan kantonê Şehbayî de debara xo kenê la her rey dewleta tirkan hêrişê ma kena. Vera ke cîyayî bikero mîyanê tutan, pîl û cinîyan hêriş dana dewamkerdiş la ma fek xoverdayîş, têkoşîn û herra xo ra vera nêdanê.”