MERKEZÊ XEBERAN - Agêrayîşê seba Şengalî dewam o, ame neqlkerdiş ke do ewro 70 keyeyê bînî kampê Başûrê Kurdistanî de yê, agêrê Şengal.

 

11 hezar keyeyê ke nameyê xo qeyd kerdê û pêro belgeyê xo temam kerdê, ewro 70 keyeyê Şengalî rê, rayîr ame akerdiş ke agêrê serê ca û wareyê xo. Bi seyan keyeyî zî amadekarîyê xo kenê ke rojê bêrê de agêrê

 

Keyeyê ke do agêrê Şengal, temamê xo Kampê Başûrî ra yenê. Xeylê xo zî kampa Mam Reşan û Êsiya yê girêdayeyê Duhokî yenê.

 

Wezaretê Koç û Koçberan qerar da ke heta 30ê Temmuze berê temamê kampê Başûrê Kurdistanî bêrê padayîş û pêro koçberî agêrê serê ca û wareyê xo.

 

Wezaretê Perwerdeyî yê Iraqî zî neql kerdibi ke do emser û badê êdî mektebî kampan de nêrê akerdiş û do pêro sazgehê xo yê girêdayeyê perwredeyî kampan ra bianco.

 

Goreyê agahîyê ke kampan ra ameyê girewtiş, bi seyan keyeyê bînî xo amade kenê ke rojê bêrî de agêrê Şengal.