Pelşîn Çetînkaya

 

AMED - Endama Kordînasyonê Cinîyanê Ciwanan ê DEM Partî Helîn Koçak derheqê turnuvaya futbolî ya serê nameyê Gulistan Doku pê yena de qisey kerd û da zanayîş ke sporê wina amancê înan ra yenê dûrvistiş û îqtîdar polîtîkayê şerê taybetî serê ciwanan de rayîr ra beno. Helîne dîyar kerd ke bi na turnuva hedef kenê ke her ciwan bi îradeyê xo nê polîtîkayan peyser bêtesîr verdo.

 

Meclîsê Ciwanan ê Partîya Têduştî û Demokrasîyî yê Şaran (DEM Partî) do emser serê nameyê wendekara unîversîte Gulistan Doku ya 5ê Çeleyî 2020î de Dêrsim de ameye vînîkerdiş û aqûbetê aye hema zî nîno zanayîş, tûrnûvaya fûtbolî organîze kerdo. Muracatê seba Tûrnûvaya Fûtbolî ya Gulistan Dokû 18ê Nîsane de dest pêkerd. Muracatî do 21ê Gulane de peynî bibê. Muracatî seba turnuvaye dewam kenê û her bajarê Kurdistan û Tirkîya de afîşî ameyî daliqnayîş.

 

‘Polîtîkayê şerê taybetî her ca de giran benê’

 

Helîne da zanayîş ke polîtîkayê şerê taybetî roj bi roje giran benê û wina vat: “Nê semedî ra hedef û berpisyarîyê ma yê esas oyo ke nê metodê şerê taybetî bêrê tespitkerdiş, veng bêrê vetiş û derheqê her wareyê cuye de alternatîfê xo awan kerdê. Na  çarçewa de metodê şerê taybetî ke yenê rayîr ra berdiş, tesîr serê tut û ciwanan de keno, tutî û ciwanî bi rehetî eşkenê xo biresnê tiryakî, asîmîle bibê, bikewê fuhuş, bê vîr û bawerî manenê. Bi nê argumanê şerê taybetî wazenê her wareyê cuye muhtewayê ci veng bikerê.

 

 

‘Cinî do şerê taybetî teşhîr bikerê’

 

Helîne dewam de wina vat: “Ma nameyê turnuva sey Gulîstan Doku dîyar kerd. Bi taybetî Kurdistan û Tirkîya de hema hema her roje hedîseyêk qewîmyena. Ma nînan xeberan de vînenê. Ma  heqîqetî nêvînê ma do vajê Gulîstan Doku wendekarêke unîversîteye bî û waştîya lajê amîrê emniyetî bî û ma do derbaz bikerê. La no ma rê xeylê çî îfade keno. Sey tecrubeyêk bi dej ganî tespîtê rastî bêrê kerdiş. Ma rastîya Gulîstan Doku zî wina kenê dest. Hedefê ma oyo ke her ciwan bi vindertişê xo polîtîkayê şerê taybetî bipelçiqno."

 

‘Ganî cinî pawitişê xo yê cewherî bikerê’

 

Helîne dîyar kerd ke ganî her cinîya ciwane ewilî rêxistinbîyayîşê xo bi pawitişê cewherî bikera û rastî zî rast biwana. Helîne vat, ez venga pêro ciwanan kena ke tewrê turnuvaye bibê.