Elfazî Toral 

 

STENBOL - Cinîyan reakîyon hemverê qerarê Dewaya Kobanî mojnayî û vatî: “Ma bi têkoşîn, vindertiş û qerarê xo yê bi hişmend, senîn ke vizêrî hemverê DAIŞî de Kobanê pawit, ma do ewro kîşte têkoşînê şarê kurdî û sîyasetmedaranê ke têkoşînê azadîye kenê, bibê. Têkoşînê ma nêqedîyayo dewam keno.”

 

 

Roniştişê qerarî yê Dewaya Kobanê ke bi sebebê çalakîyanê hemverê hêrişê DAIŞî 6-8ê teşrîna verêne 2014ine de ameyî organîzekerdiş, ame akerdiş û Hemserekê Pêroyî yê Partîya Demokratîke ya Şaran (HDP) Fîgen Yuksekdag û Selahattîn Demîrtaş zî mîyan de 18 ci ra tepişte, bi pêroyî 108 sîyasetmedarî ci ra yenê muhakemekerdiş, ame vînayîş. Çarçewaya dewa de 42 serrî cezaya zîndanî Hemserekê verî yê Partîya Demokratîke ya Şaran (HDP) Selahattîn Demîrtaş û 30 serrî û 3 aşmî cezaya zîndanî Fîgen Yuksekdage rê ame birnayîş. Seba 5 sîyasetmedarê tepişteyî qerarê veradayîşî û 12 kesan de zî qerarê beraetî ame dayîş. Çarçewaya dewa de qerarê dewamkerdişê tepiştişê 13 kesan ame dayîş û bi pêroyî derheqê 21 sîyasetmedaran de 374 serrî û 7 aşmî ceza ameye birnayîş.

 

Reaksîyonê hemverê qerarî dewam kenê. Derheqê babete de Temsîlkara Serekîya Pêroyî ya Partîya Şorişgêr Gamze Taşçi û femînîst Roza Kahya qisey kerdî. 

 

‘Ma do têkoşînê xo dewam bikerê’

 

Temsîlkara Serekê Pêroyî ya Partîya Şorişgêr Gamze Taşçi da zanayîş ke dewaya destpêkî heta nika bi hawayêkê bêhuqûqî ameya kerdiş û wina vat: “Na dewa pawitoxîyê faşîzmê AKPyî yê DAIŞî yo. DAIŞ Kobanê û Rojawan de vînî kerd û heyfê ci sîyasetmedaranê kurdan ra gênê. Bi seyan ceza dayî embazanê ma. Tarîxê şorişgêran zêdeyêr tarîxê sêdar û zindanan o. Ma do vindertiş û polîtîkayî ra tawîz nêdê û têkoşînê xo dewam bikerê.”

 

‘Ma do şarê kurdî zî bipawê’

 

Gamze dewam de vat, hukm sîstemêk ke bi destê hukmê AKP-MHPyî ameyo awankerdiş o û wina vat: “Qerarê hukmê Tirkîya hukmê ci çin o. Ma şorişgêrî do şarê kurdî reyde yewîya xo dewam bikerê. Ma do  vindertiş û têkoşînê xo, senîn ke vizêr Kobanê hemverê DAIŞî pawit, ma do ewro zî heqê şarê kurdî bipawê. Tîya ra tepîya zî ma do xoverdayîş û têkoşînê xo, cigêrayîşê edeletî û heqîqetî dewam bikerê.”

 

‘Kobanê nêkewt gane bî’

 

Roza Kahya zî dewam de wina vat: “Bi serran o dewa wina dewam kerdî. Serekkomarê AKPyî Tayyîp Erdogan vat, ‘Kobanê ver bi kewtişî yo’. La Kobanê nêkewt, newe ra gane bî. Toximê cuye yê xoverdayîşê Kobanê ewro pêro herra Kurdistan û Tirkîya de gane bîyo. Vengê nê têkoşînî her ca de veng dayo. Seba ke ceza embazanê ma rê ameye birnayîş. Ma seba embazê xo yê ameyê tahlîyekerdiş çiqas keyfweş ê, no qasê seba embazê ke ceza înan rê ameyî birnayîş bi hêrs û xemgîn ê”

 

‘Her kes seba Kobanê têkoşîn keno û rumetê me ma yo’

 

 

Roza qiseykerdişê xo wina peynî kerd: “Ma do bi sîyasetmedarê ke ameyê veradayîş reyde têkoşîn newe ra bimunê. Ma do xerîtaya rayîrî ya têkoşînî tewr zêde xurt bikerê. Ma do bi embazanê xo reyde têkoşînê xo hîna pîl bikerê. Ez venga têkoşînî pêro kesan ra kena. Pêro kesê wayîrê Kobanê, dewaya Kobanê vejîyenê rumetê ma yê.”