Oznur Deger

 

MÊRDÎN - Cinîyan reaksîyon vera qerarê dewaya  Kobanê mojnayî û dîyar kerdî ke ê do nê qerarî nas nêkerê û sere nêtewênenê.

 

Roniştişê dewaya Kobanê ke bi sebebê çalakîyê hemverê hêrişê DAIŞî 6-8ê teşrîna verêne 2014ine de ame kerdiş û Hemserekên Pêroyî yê Partîya Demokratîke ya Şaran (HDP) Fîgen Yuksekdag û Selahattîn Demîrtaş zî mîyan de 18 ci ra tepişte, bi pêroyî 108 sîyasetmedarî ci ra yenê muhakemekerdiş, ame vînayîş. Çarçewaya dewa de 42 serrî cezaya zîndanî Hemserekê verî yê HDPyî Selahattin Demirtaş û 30 serrî û 3 aşmî cezaya zîndanî Figen Yuksekdage rê ame birnayîş. Seba 5 sîyasetmedaranê tepişteyan qerarê veradayîşî û 12 kesan de zî qerarê beraetî ame dayîş. Çarçewaya dewa de qerarê dewamkerdişê tepiştişê 13 kesan ame dayîş û bi pêroyî derheqê 21 sîyasetmedaran de 374 serrî û 7 aşmî ceza ameye birnayîş.

 

Reaksîyonê hemverê qerarê ceza her ke şino zêde beno. Sîyasetmedarî, rojnamegerî, hunermendî û pêro hetê muxalîf bi yew vengî, vengê xo berz kerdî. Cinîyê Mêrdînî zî reaksîyon vera qerarî mojnayî û dîyar kerdî ke ganî her kes hemverê nê qerarî de vindero.

 

‘DAIŞî Kobanê vînî kerd’

 

Hemsereka Partîya Têduştî û Demokrasîyî yê Şaran  (DEM Partî) ya Mêrdînî Necla Acibuca dîyar kerd ke Dewaya Kobanê dewaya merdimayî û demokrasîyî ya û wina vat: “Ma nê qerarî qebûl nêkenê. No qerar DAIŞî rê xizmet keno. Ma hemverê nê qerarî de sere nêtewênenê û ma do kuçeyan de bê. Ma nê bêhuqûqî qebûl nêkenê. Kobanê nêkewt û ser kewt. DAIŞî Kobanê de vînî kerd. La îqtîdar DAIŞî rê xizmet keno. Hewl dano înan xurt bikero.”

 

Verfeka Têgêrayîşî Cinîyê Azadan (TJA) ê Mêrdînî Ayşe Bozan, dîyar kerd ke na dewa nêçareserîyê problemê kurdî ferz kena û wina ard ziwan: “Na dewaya hemverê demokrasîyî de cinî yenê muhakemekerdiş. Sîyasetê kurdî yeno muhakemekerdiş. Ma qerarê dadgehe şermezar kenê. Tedayê serê kurdan peynî nêbenê. La îqtîdar nê netîceyî nêgîno û tîya ra tepîya zî do nêgîro. Cinî hemverê zîhnîyetê DAIŞî têkoşîn kenê. Ganî ma pêro embazanê xo wayîr vejîyê. Ganî her kes hemverê zîhnîyetê DAIŞî têkoşîn bikero.”

 

‘Ma sere nêtewênenê’

 

Endama DEM partîye Hasîbe Mengîkaon zî wina vat:  “Tarîx de kurdî her wext ameyê înkarkerdiş. Sîstemê AKPyî sîstemê darbeyî yê Kenan Evrenî yo. Sîstemê çeteyî yê Tansu Çîllere yo. Na dewa reyde reyke bîn  vejîya werte ke şarê kurdî qirkerdişan reyde ameyo rî bi rî. Ma şahidê xoverdayîşê Kobanê yê. Erdogan vat, do Kobanê bikewo la nêkewt. Şarê kurdî xo ver da.  Waştî heyfê nê kurdan ra bigîrê. La ser nêkewtî. Çi kenê wa bikerê do biser nêkewê. Do sîstemê înan vînî bikero û ma do her tim xo ver bidê.”