Nazlican Nûjîn Yildiz

 

İZMİR - Cinîyê Sîyasetmedarî ke reaksîyon vera qerarê Dewaya Kobanê mojnayî, dîyar kerdî ke pawitişê Kobanê Meşrû yo, tu hukmê qerarî çin o û vatî ke ê do têkoşînê kede û azadîye dewam bikerê.

 

Roniştişê qerarî yê Dewaya Kobanê ke bi sebebê çalakîyê hemverê hêrişê DAIŞî de 6-8ê teşrîna verêne 2014ine de ameyî kerdiş de, ame dayîş û Hemserekên Pêroyî yê Partîya Demokratîke ya Şaran (HDP) Fîgen Yuksekdag û Selahattîn Demîrtaş zî mîyan de 18 ci ra tepişte, bi pêroyî 108 sîyasetmedarî ci ra yenê muhakemekerdiş, ame vînayîş. Çarçewaya dewa de 42 serrî cezaya zîndanî Hemserekê verî yê HDPyî Selahattin Demirtaş û 30 serrî û 3 aşmî cezaya zîndanî Fîgen Yuksekdage rê ame birnayîş. Seba  5 sîyasetmedarê tepişteyî qerarê veradayîşî û 12 kesan de zî qerarê beraetî ame dayîş. Çarçewaya dewa de qerarê dewamkerdişê tepiştişê 13 kesan û bi seyan serrî ceza sîyasetmedaran ame birnayîş.

 

Reaksîyonê hemverê qerarê dewa de xeylêk hetan ra dewam kenê, cinîyê sîyasetmedarî yê Îzmîrî zî derheqê dewa de qisey kerdî û reaksîyonê xo ardî ziwan.

 

'Ma do hêzê xo zêde bikerê'

 

Meclîsê Cinîyan ê Partîya Têduştî û Demokrasîyî (DEM Partî) ya Îzmîrî ra Aysel Onene dîyar kerd ke destpêk de hêvîya înan estbî û dîyar kerd ke na hêvîye zî serkewtişê Kurdistanî ra pê ameyo. Heto bîn ra Aysele dîyar kerd ke ê pawe bî ke dimayê serkewtişêk pîl hêrişê hukmatî pê bêrê û vat, "Pêro nameyê serkêşî yê partîya ma zere de yê û zanenê ke vejîyayîşê înan do ma xurt bikero. Hewl danê ma bê bask verdê. La ma do hêzê xo zêde bikerê, tu çareyêk ma yê bîn çin o."

 

 'Xoverdayîşê Kobanê xoverdayîşê şarî û cinîyan bî'

 

Sîbel Yaşara ke Kaldiraç de ya ard ziwan ke sîstemê kapîtalîst seba biciwîyo dest bi şeran kerd û vat: “Nê şeran de Kobanê bî wareyê ke pêro şaran xo ver da û pêro cinîyan têkoşînê xo yê azadîye kerdî. Ma sey şorişgerê Anatolyayî demê Kobanê de tîya verê barîkatan bîyî û ma pîya azadîya şaran pawit. DAIŞo ke sey laboratûvar bî, cinî û tutî bi hawayêk hovane qetil kerdî. Xoverdayîşê hemverê nê ame dayîş şar û cinîyan bî.”

 

'Ma qebûl nêkenê'

 

Îdarekara Bajarê Îzmîrî ya DEM Partîye Hatîce Erdogan zî dîyar kerd ke no qerar nêheqî û bêqanûnî yo û vat: "Bêşik sûcdarkerdişê sîyasetê kurdî û sîyasetmedarê HDPyî bi temamî qerarêk rast nîyo. Bi xususî hemverê sîyasetmedarê cinî xeylêk sûcdarkerdiş û cezayî ameyî birnayîş. Helbet ma nê cezayan qebûl nêkenê."

 

Qerarê bawerîya bi aştîye qels kerd

 

Hatîce dîyar kerd ke bi qerarê bawerîya şarê kurdî û hetê çep û sosyalîstî yê bi aştîye kêm bîyî û vat, no qerar tu hukmê ci çin o. Hatîce vat, “Ma qebûl nêkenê. Ma do têkoşînê xo yê ked û azadîye bi pêro şaran reyde dewam bikerê. Temamê rayaumûmî dî ke HDP hemverê hovîtîya DAIŞî de  helwestêk rast mojna. Ma do bi pêro embazanê xo yê ameyê vengkerdiş reyde rayîr ra şêrê ke nê birijnê."