RIHA- Hemsereka DEM Partîye ya Rihayî Sema Aîşeoglu seba weçînayîşê 2ê Hezîrane yê Curnê Reşî pê yenê veng da û vat do serkewê. Sema venga weçînîtoxê ke bi têgêrayîşî ke sey karkerê demsalî şîyê bajaranê bînan kerd.

 

Partiya Têduştî û Demokrasîyî yê Şaran (DEM Partî) dimayê 45 serran dima qezaya Curnê Reşî ya Rihayî de ser kewt. La serê îtîrazê AKPyî bi qerarê YSKyî do 2yê hezîrane de ancî weçînayîş bêro kerdiş. Şarê Curnê Reş ke do ancî şêro serê sindoqan venga wayîrvejîyayîşê îradeyî kerd. Hemsereka DEM Partîye ya Rihayî Sema Aîşeoglu vat, do 2yê Hezîrane de zî bi ser kewê.

 

‘AKP û terefgirê xo tehemul nêkerdî’

 

Sema qiseykerdişê xo de dîyar kerd ke Riha de weçînayîşê 31ê Adare de serkewtişêk pîl ameyo bidestkerdiş û wina vat: “AKP û terefgirê xo serkewtiş hezm nêkerdî û îtîraz kerdî. Ma do reya diyîn serbikewê. Ez pêro şarê ma silam kena. Ma tarîxê Rihayî de çîyê yewin cîwîyayî. Ma serkewtişê weçînayîşê herêmî bi serkewtişê Curnê Reşî tacîdar kerd. La çi heyf AKP û terefgirê ci tehemulê nê çî  nêkerdî. Ma do 2yê Hezîrane de ancî şêrê serê sindoqan. Ma bi bawerîya ke ma do bi serkewê xebatî dayî destpêkerdiş.”

 

‘Netîceyêk Curnê Reşî de ameyo ciwîyayîş vînîkerdişê AKPyî yo’

 

Sema dewam de bale ant serê welatijê qeza ke karkerîya mewsîmî şinê bajarê bînî û vat: “Curnê reşî ra xeylê kesî şinê karkerîya demsalî. Riha nê wareyî de rêza yewine de ya. Na netîceya polîtîkaya vînîkerdişî yê AKP û partîyê sîyasî yo. Bajar de betalî û nifûsê ciwanan zêde yo. Weçînayîşan de ganî karkerê mewsîmî bêrê raya xo bişuxilnê. Seba ma karkeran bîyarê ma amadekarîyê xo temam kerd. Ganî bi DEM partîye reyde bikewê têkilîyê.”

 

 

‘Ma do serbikewê’

 

Sema peyîn de vat ke ê Curnê Reş de ser kewtibî û do ancî serbikewê û wina vat: “No serkewtiş ê şarê kurdî yo.  Ma wazenê şarê ma roja weçînayîşî îradeyê xo nîşan bido. Bi serran o na qeza bi sîstemê feodalî, eşîr, îqtîdarî yena îdarekerdiş. Ma 31ê Adare de serkewtî û ma do 2ê Hezîrane de zî serbikewê.”