Elfazî Toral

 

STENBOL - Sereka Şubeyê ÎHDyî ya Stenbolî Gulseren Yolarî û avûkate Ayşe Ozdemîr derheqê qirkerdişê hemverê keyeyê Şenyaşare de ame kerdiş qisey kerd û vatî: “Ma her tim kîşte têkoşînê edeletî yê Emîne Şenyaşare de yê. Lazimîya komelî zî bi edeletî est a. Seba nê ma kesê ke têkoşînê huqûqî danê zî paş danê waştişê Emîneye û ganî her kes goş bido nê vengdayîşî. Ganî her kes 24ê Gulane de verê wezaretî de bê û paştdayîş bidê eşkerayîya Emîne Şenyaşare.” 

 

Pawitox û merdimê parlamenterê AKPyî yê verê Îbrahîm Halîl Yildiz 14ê hezîrana 2018ine de qezaya Pirsûsî ya Rihayî de hêrişê dikanê keyeyê Şenyaşarî kerd. Hêriş de cinî û di lajê Emîne Şenyaşare amebî qetikerdiş. Emîne Şenyaşar û lajê aye Parlamenterê Partiya Demokratîke yê Şaran (DEM Partî) yê Rihayî Ferît Şenyaşar verê awanîya edliye de û serdozgerîya komare ya Rihayî de 846 rojan nobeta edeletê girewtî û dima ra Nobeta Edeletî vurnabî verê Wezaretê Edaletî yê Anqarayî. Nobete, roja 106ine de dewam kena. Emîne ke rojê vîyarte de meclîs de qisey kerd ke do 24ê Gulane de verê wezaretî de eşkerayîyêke bidê û venga ‘ez her kesî rê edalet  wazena. Şima pêrûne seba edeletî pawena verê wezaretê edaletî.”

 

Sereka Komeleya Heqê Merdiman (ÎHD) ya Stenbolî Gulseren Yolerî û avûkate Ayşe Ozdemîr derheqê têkoşînê edeletî ya Emîne Şenyaşar û eşkerayîya aye 24ê Gulane de bêro dayîş veng kerdî û wina vatî:  “Ma paştî danê têkoşînê keyeyê Şenyaşar e. Ganî her kes bibo hemkarê nê têkoşînî.”

 

‘Hemverê keyeyî de qirkerdiş pê ame’

 

Gulserene da zanayîş ke cigêrayîşê edeletî yê Emîne Şenyaşar zaf muhîm o û vat: “Roja têkoşînê înan dest pêkerdo ma kîşte înan de bî. Tirkîya de kulturê bêcezaverdayîşî resayo sewîyeya tewr cor. Ma zanê ke kesê ke nê sûcan kenê senî yenê xurtkerdiş. Hemverê keyeyî de qirkerdiş pê ame. Pêwa şikdarî dîyar ê nêameyî cezakerdiş. Şikdarî bi hawayê cîya yenê pawitiş.”

 

‘Ma kîşte têkoşînê edeletî de yê’

 

Gulserene têkoşînê dayikê şemeyî, keyeyê Qezaya Trenî yê Çorluyî ard vîr û wina vat: “Cigêrayîşê edeletî yê keyeyan est o. Ma kîşte pêro keyeyê ke têkoşîn danê de yê. Edelet pê nîno. Ma do tim hetê edaletî de bibê. Emîne Şenyaşar do 24ê Gulane de verê wezaretî de eşkerayîye bido. Ma wazenê pêro pawitoxê heqî paştdayîş bidê. Lazimîya pêro komelî bi edeletî est a. Ma her şert û mercî de kîşte Emîne Şenyaşar de yê. Ma do têkoşînê xo dewam bikerê. Na eşkerayîye seba edeletî do gamêke bibo. Ganî pêro sazgehê komelê sivîlî paştdayîş bidê.”

 

‘Şikdarî nînê vînayîş’

 

Avûkate Ayşe Ozdemîr zî vat, hem Tirkîya û hem zî dinya de zemînêk sîstematîk yê pratîkê bêcezaverdayîşî est o û wina vat: “Vera ke normê huqûqî, îdareyê zextî normê tedbîrê ke seba bêceza verdayîşî pê anê. Şikdarî yenê pawitiş. Ma ewnîyenê Kurdistan de no zêde pê yeno. Dewlete şikdarê ke benê sebebê binpaykerdişê heqî nêvînenê û huqûqî werte ra  wedarneno. Ma eşkenê xeylêk nimûneyê polîtîkaya bêcezaverdayîşî bimojnê. Emîne Şenyaşar 6 serrî yo têkoşîn keno. Aye êdî bîya sembol. Di lajê aye û mêrdeyê aye bi hawayêk hovene ameyî qetilkerdiş.”

 

‘Ganî Emîne Şenyaşar tenê nêro verdayîş’

 

Ayşe wina qedêna: “Ma prosesêk ke huqûq ca nîno,  edelet cayê xo nêgîno, qerarê DDByî zî pê nînê ra derbaz benê. Parlamenterêk endamê partîya îqtîdarî û keyeyê xo qirkerdişêk wina kenê. La hukm pê nîno. No zî her çî mojneno. Têkoşînê edeletî yê Emîne Şenyaşar vuryayo sembol û bi israrêk pîl têkoşînê xo keno. Ganî Emîne Şenyaşar tenê nêro verdayîş. Ganî her kesê ke têkoşînê huqûqî danê veng bidê Emîne Şenyaşare.”