MERKEZÊ XEBERAN - TAJÊ bi amancê wendiş û nuştişê ziwanê kurdkî cinîyanê êzidîyan rê bimusno, dewreyêk nêzdîyê 15 rojan organîze kerd.

 

Têgêrayîşê Azadîya Cinîyê Êzidî (TAJÊ) seba cinîyanê Şengalî merkezê xo de seba musnayîşê wendiş û nuştişê ziwanê kurdkî (kurmancî) dewreyêk 15 rojî rêxistin kerd. Perwerdeyê TAJÊ rastê eleqeyêk pîl ê cinîyan ame.

 

Cinîyê ke tewrê dewreyê perwerdeyê wendiş û nuştişê kurdkî bîyî, venga pêro cinîyan û dayîkan zî kerdî ke ziwanê dayîke bimusê û nê îmkanî ra fek vera nêdê.

 

Mîyanê dewreyê perwerdeyî de Endamê Kordînasyonê TAJÊ, Hemserekê Meclîsê Şarî yê Şengalî û endamê sazgehê Îdarekarîya Xoser tewr bîyî.

 

Sînem Îbrahîm dîyar kerd nêzdîyê 15 roje perwerdeyê ziwanê dayîke benê û wina vat: “Dayîkî û cinîyê ciwanî tîya tewrê perwerdeyî bîyî. Heta nika ma herfî musayî. No perwerdeyêk zaf weş o. Pêwa nê emrê xo zî ma hema xeylê çîyan musenê. Ganî  dayîkê ma yê Şengalî ziwanê dayîke bimusê.”

 

Xalîde Cemal zî keyfweşîya xo seba na xebate ard ziwan û wina vat: “Ma nika ziwanê dayîke musenê. Ma do dima ra bieşkê tutanê xo rê zî bimusnê, seba ke ma ameyox de bi ziwanêk hîn bînan qisey nêkerê.”

 

Cinîya ciwan a bi nameyê Nedo Sado zî dîyar kerd, ê ziwanê xo yê dayîke musenê, seba tutanê xo zî bi zimanê dayîke bimusnê û nêşêrê ziwanê xerîbî nêmusê û nê mesajî da: “Ma sipasîyê mamosteyanê xo kenê ke seba ma kede danê. Ma hem tîya derse vînenê û hem zî keye de dersê ke ma dîyê tekrar kenê. Wexto ke ma wanenê, tutê ma zî musenê û sey ma kenê.”