Rozerîn Gultekîn

 

STENBOL - Avûkata OHDyî  Elîf Taşdogen derheqê vatişê wezaretê edaletî yê ‘Îmraliyî de tecrîd çin o’ qisey kerd û vat: “No vatişêk somit ê derheqê  bîyayîşê tecrîdî de yo. La bêhuqûqîyê serê birêz Ocalanî de israr kenê. Ganî huqûqnas, pawitoxê heqê merdiman û baro hemverê nê de vengê xo berz bikerê.”

 

Rayberê PKKyî Abdullah Ocalan û hîrê tepişteyê bînî yê Îmraliyî 38 aşmî yo tu agahî nîna girewtiş. Pêwa ke 30 serrî yo cezaya tepişte Veysî Aktaş temam bîya zî tahliyeyê ey serrêke bîn ame taloqkerdiş. Parlamenterê Partîya Têduştî û Demokrasîyî yê Şaran (DEM Partî) seba tecrîd wurzo, seba keye û avûkatî pêvînayîşê xo bikerê 7ê Kanûna 2023ine de muracatê Serekîya Komîsyonê Cigêrayîşê Heqê Merdiman ê Meclîsî (ÎHÎK) kerdî. Mudûriyetê Pêroyî yê Keyeyê Tevkîf û Ceza ya Wezaretê Edaletî îdia kerd ke ‘Pêro tepişteyî heqê têduştî ra feyde gênê’. Dimayê na eşkerayîye 28ê Adare de ame zanayîş ke Abdullah Ocalan û tepişteyê bîn Omer Hayrî Konar, Veysî Aktaş û Hamîlî Yildirim qedexeyêk pêvînayîşî yê neweyî 3 aşman ameyo dayîş.

 

Avûkata Komeleya Huqûqnasê seba Azadîye (OHD) Elîf Taşdogen hemverê tecrîdê Îmraliyî de qisey kerd.

 

‘No vatişêk somut nîyo’

 

Elîfe vat, Midûriyetê Pêroyî yê Keyeyê Tevkîf û Ceza yê Wezaretê Edaletî îdia kerd ke tecrîd çin o la cezaya 3 aşmî yê qedexeyî dayê û wina vat: “Ma  rewşa somut bidê werte, teberê nê vatişî rastîyêk bîn est o? Birêz Ocalan avûkatan reyde pêvînayîş nêkerdo, keyeyî reyde pêvînayîş nêkerdo, bi telefon nêkerdo. Wexto ke ma ewnîyenê nê tabloyî ra vatişê Midûriyetê Pêroyî yê Keyeyê Tevkîf û Ceza ya Wezaretê Edaletî rastî nêmojneno. Eşkerayîye de yeno vatiş ke tecrîd çin o, tepişteyanê bînan reyde aktîvîte yena kerdiş. Gelo bi rastî Birêz Ocalan tepişteyanê bînan reyde yeno têhet? Gelo tepişteyî mabêne xo de yenê têhet? Îdiayê înan oyo ke nê çî yenê kerdiş. La tecrîd her çî mojneno. Ma zanê ke  Midûriyetê Pêroyî yê Keyeyê Tevkîf û Ceza ya Wezaretê Edaletî tecrîd beno sewîyeya tewr cor.”

 

‘Dewleta Tirkîya tedbîrê xo gêna’

 

Elîfe vat, cezayê kêfî yê dîsîplînî sey gorê huqûqî yê mojnenê û wina vat: “Ceza û cipersayîşê dîsîplînî avûkatan rê nîno teblîgkerdiş. Bi no hawa rayîrê îtîrazî yenê padayîş. Vernê de mekanîzmayê huqûqî yenê padayîş. Wexto ke cipersayîşêk dîsîplînî bêro akerdiş mecbûrî avûkatan rê yeno teblîgkerdiş. Ma eşkenê vajê zîndanê Îmraliyî de bêhuqûqî ameyo awankerdiş. Qerar avûkatan rê nîno teblîgkerdiş, muracatê avûkatan nîno girewtiş. No huqûq de çin o. Dewleta tirkan zanane ke prosesêk hukmî yê bêhuqûqî est o û ewro de hewl dano tedbîrê xo bigîro.”

 

Tahliyekerdişê Veysî Aktaş 

 

Elîfe wina dewam kerd: “Tepişte Veysî Aktaş 28ê Nîsane de ganî biameyîne tahliyekerdiş. La înfazê ey serrêke ame taloqkerdiş. Sebebê taloqkerdişê înfazê ey bi sebebê qedexeyê pêvînayîşê avûkatan est o nêame dayîş. No zî bêhuqûqî mojneno. Cewabê nê huqûqê Tirkîya de zî çin o. Sebebêk bîn yê nêtahliyekerdişê Veysî Aktaş est o. Veradayîşê Veysî Aktaşî ameyîne manaya teşhîrkerdişê tecrîdî.”

 

‘Bêhuqûqî de israr kenê’

 

Elîfe wina peynî ard: “Bêhuqûqî bêvengîya komelî reyde xorîn bena. Wina tecrîdê Îmraliyî giran beno. Tecrîd problemêk hetêk tenê nîyo. Tecrîd problemêk pêroyî yo. Tesîr serê pêro kesî de keno. La hiqûqnasî, veng nêkenê. Seba bêhuqûqî Birêz Ocalanî rê yeno kerdiş nêvînayîşî de israr kenê. Ganî baro, avûkatê heqê merdiman û hiqûqnasî vengê xo berz bikerê. Hemverê nê huqûqî de ma do bi înat têkoşînê xo yê huqûqî bikerê.”