WAN - Endama Meclîsê Ciwanan ê DEM Partîye Lorîn Aryen Turgut dîyar kerd ke cinîyan eleqeyêk pîl turnuvayê futbolî ke serê nameyê Gulîstan Doku ca amê, mojnayî û vat: “Ma tu wext apey game nêerzenê û ma do persê ‘Gulîstan Doku ça de ya?’ bipersê.”

 

Meclîsê Ciwanan ê Partîya Têduştî û Demokrasîyî yê Şaran (DEM Parti), çarçewaya kampanya ‘hemverê şerê taybetî de têkoşînê bi heybet’ yê 5ê Tebaxa 2023ine de ameyo destpêkerdiş bi sloganê "Hemverê polîtîkayê şerî: Pirode" turnuvayê futbolî ca ano. Turnuvayê emserî seba Gulîstan Doku ya 4 serrî yo vînî ya, ca bêro. Muracatê turnuvayî heta 21ê Gulane dewam keno. Cinîyê ke eleqeyêk pîlî turnuva rê mojnenê di komê ci 14 hemşaredarê cinî yê DEM Partî pê yeno. 

 

Endama Meclîsê Ciwanan ê DEM Partî Lorîn Aryen Turgut derheqê babete de qisey kerd û vat, heta nika 60 tîmî muracat kerdê.

 

‘Ma do hesabê embazanê xo bipersê’

 

Lorîne da zanayîş ke turnuvayê futbolî yê emserî pê yeno, emser bi sloganê ‘pirode’ û ‘ciwanî ware de yê’ pê yeno. Lorîne vat: “Serranê verînan serê nameyê Kemal Korkut, Denîz Poyraz û Ozan Yildiz kerdî. Emser ma dîyarîyê Gulîstan Doku, Îpek Er, Denîz Poyraz, Ozgecan kenê. Ma do her tim hesabê înan bipersê. Ma do hesabê înan zîhniyetê faşîstî ra bipersê. Ma nê zîhniyetî serê herra xo ra bicehniminê.”

 

‘Muracatî heta 21ê Gulane dewam kenê’

 

Lorîne bale ant serê Turnuvayî û vat, her bajarê Kurdistanî û xeylêk bajarê Tirkîya de bikerê û wina vat: “Muracatî 18ê Nîsane dest pêkerd û do heta 21ê Gulane dewam bikero. Embazê ma eşkenê her qeza û merkezî bi rayîrê telefonî muracat bikerê. Ma rêxistinbîyayîşê xo bimojnê û wareyan de bêrê têhet. Şerê taybetî çî yo? Hetê kamî ra yeno kerdiş? Amanc çî yo? Ganî cewabê nînan bêro vînayîş û bêro famkerdiş. Şerê taybetî wazeno cigêrayîş, hewldayîş, azadî çin bikero.”

 

‘Ma do sîstemê desteştişî rê dinya teng bikerê’

 

Lorîne qiseykerdişê xo wina dewam kerd: “Şerê taybetî zaf hetî yo. Bi taybetî serê bedenê cinîyan de yeno kerdiş. Kurdistan de şexsê Îpek Er, Gulîstan Doku, Ekîn Wan de polîtîkayê lêşînî ameyî kerdiş. La ma vanê ke ma sîstemê desteştişî rê ware nêverdenê. Ma do dinya înan rê teng bikerê. 5ê Çeleyî 2020ine ra heta nika aqûbetê Gulîstane nîno zanayîş. Îdiayê ke întîxar kerda, eştî werte. La ma zanê ke ê hewl danê xo xilas bikerê. La ma tu wext fek têkoşînî ra vera nêdanê.”

 

Seba turnuvayî eleqeyêk pîl

 

Lorîne qiseykerdişî xo wina peynî kerd: “Amancê turnuvayê ma oyo ma bimojnê ke futbolêk rêxistinkerde û amancê ci yê hişmendkerdişî, mumkin o. Cinî, ciwanî û şarê ma ke muracatê turnuva kenê zî hişmendîyê nê de yê. No semed ra muracatî zêde benê.”