Elfazî Toral

 

STNEBOL - Rojnamegere Încî Hekîmoglu derheqê binpaykerdişî heqan ê hemverê çapemenîya azade de qisey kerd û wina vat: “Hemverê çapemenîya kurde de binpaykerdişê heqan ê bi xof yenê ciwîyayîş. Yê ke hemverê nê de bêveng manenê zî hemkarê nê sûcî yê. Ganî rojnamegerê kurdî rojeva her kesî de bê.”

 

Tedayê serê çapemenîya azade roj bi roje zêde benê. Çapemenîya azade ke bena vengê şarî û heqîqetî, bena hedef û bi destbendkerdiş, hêrişan hewl yeno dayîş ke bêra pelçiqnayîş. Tewr peyîn 23yê Nîsane de Merkezê ci Stenbol operasyon ame kerdiş û 9 rojnamegerî ameyî destbendkerdiş. Mûxabîra MAyî Esra Solîn Dal û Mehmet Aslan, rojnameger Erdogan Alayumat 26ê Nîsane de ameyî tepiştiş. Zîndanê Cinîyan ê Bakirkoyî de rojnamegere Esra Solîn Dal cigêrayîşê zitî ame kerdiş û bi rojan o hucreya yew kesî de yena tepiştiş. Ancî 6ê Gulane de rojnamegere Derya Us û Nurcan Yalçin sereştişê keyeyan de amebî destbendkerdiş. Goreyê raporê ke Komeleya Rojnamegeran ê Dîcle Firatî (DFG) amade kerdo roja AKP ameyo îqtîdar 894 rojnamegerî ameyî tepiştiş. Goreyê dayeyê DFG 2002yîne de 17, 2023îne de 15, 2006ine de 22, 2007ine de 9, 2008ine de 23, 2009ine de 37, 2010ine de 9, 2011ine de 36, 2012ine de 5, 2013ine de yew, 2014ine de 2, 2015ine de 8, 2016ine de 145, 2017ine de 206, 2018ine de 56, 2019ine de 130, 2020ine de 87, 2021ine de 3, 2022yîne de 32, 2023ine de 43, 4 aşmê ewilî yê 2024ine de 8 rojnamegerî ameyî tepiştiş.

 

Rojnamegere Încî Hekîmoglu JINNEWSî rê derheqê babete de ercnayîş kerd.

 

‘Tedayê hemverê çapemenîya kurdî fe bêhuqûqî yê’

 

Înciye da zanayîş ke rojnamegerê kurdî benê hedef û wina vat: “No tenê seba pêro rojnamegeran nê seba rojnamegerê ke heqîqet vejenê werte derbazdar o. Wexto ke hemverê muxalîfan çîyêk beno, hema beno rojeve. La eke çapemenîya kurde bibo, nêbeno rojeve. Rojnamegerê kurdî bi sebebê  xeberan virazenê sûcdariyan reyde yenê rî bi rî. Sîstem hewl dano raştîya cografyaya kurde bêra nimitiş. Seba nê zî wazena çapemenîya azade bipelçiqna.”

 

‘Hemverê çapemenîya kurde de hêriş est o’

 

Încîye dewam de wina vat: “Rojnamegerê kurdî binê tedayan de yê. No zî problemê kurdî rê xoser yo.  Dewlete bi serran o polîtîkaya tedayî ca ana. Ewnîyayîşê dewlete yê hemverê babete de tu wext  nêvuryayo. No êdî problemê kurdî tenê nîyo. No problemê Tirkîyaye yo. Heta no problem çareser nêbo, do binpaykerdişî dewam bikerê. Îqtîdar vano heta ke çapemenîya kurde raştîyê herême, binpaykerdişan bîyaro ziwan do tedayê ma dewam bikerê. Çi heyf çapemenîya Tirkîya zî hemverê nê de bêveng manena û bena hemkarê nê sûcî. Hemverê çapemenîya kurde binpaykerdişê heqan ê bi xof yenê ciwîyayîş. Ganî na babete de pêro rojnamegerî, sîyasetmedarî û hetê demokratîkî agahdarkerdiş bikerê û bêveng nêmanê.”

 

‘Yê bêveng manenê dk ey zî tedayan reyde bêrê rî bi rî’

 

Încîye wina qedêna: “Yê ke hemverê nê tedayê ke serê rojnamegeranê kurdan de bêveng manenê do rojêke qetî ey zî nê tedayan reyde bêrê rî bi rî. Ganî her rojnameger wayîrê meslegdaranê xo vejîyê. Ganî hîsgêrîyê rayaumûmî bêro zêdekerdiş. Heta ke hîsgêrî nêro zêdekerdiş do her kes rojêke bibo hedefê nê bêhuqûqî û zordarî. Teda û hêrîşê serê rojnamegeranê kurdan bi hawayêk têduşt nînê rojeve. Hemverê nê tedayan serê rojnamegeranê kurdan de ganî têkoşînêk bêro dayîş.”