MERKEZÊ XEBERAN - Dewleta tirkan û komê girêdayeyê aye destpêkê serre ra nata Efrîno îşxalkerde de 2 ci ra cinî 4 kes qetil kerdî û 94 kes zî remnayî.

 

Komê girêdayeyê dewleta tirkan kantonê Efrîno ke serra 2018ine de îşxal kerd, sûcê qetilkerdişî û remnayîşî dewam kena. Destpêkê emser heta 20ê Sibate 4 welatîjî ameyî qetilkerdiş û 94 welatijê bînî zî ameyî remnayîş.

 

Aşma Çeleyî de 2 cinî ameyî qetilkerdiş, 15 cinî zî ameyî remnayîş

 

Rêxistina Heqê Merdiman a Efrîn-Sûrîye bîlançoyê xo yê Çeleyî de ard vîr ke dewleta tirkan û komê girêdayeyê aye 2 cinî mîyan de 4 welatîjî qetil kerd. Sewbîna goreyê rêxistine, dewleta tirkan û komê girêdayeyê aye 53 welatî mîyan de 15 cinî emrê înan qij û 2 tutî remnayî.

 

Girêdayeyê eynî babete, Merkezê Belgekerdişê Binpaykerdişî 20ê Sibate de raporêke serê sûcê dewleta tirkan û komê girêdayeyê ci vila kerd. Rapor de ame vîrardiş ke destpêkê Sibate û heta tarîxê vilakerdişê nê raporî 41 welatîjî ameyê remnayîş.