Dîlan Babat

 

ŞIRNEX - Namzeta hemşaredarîya Cizîrî ya DEM Partîye, Guler Tunçe da zanayîş ke do Cizîr ke serranê 90î de Berîvanan newe ra awan kerdbî, bikerê bajarê cinîyan û vat: “Vera qirkerdişê xozaye ke îqtîdar keno de bi kampanyaya ‘her keyeyêk darêk o’ Cizîr açarnayî raşteyê şîn.” 

 

Weçînayîşê herêmî 31ê Adare de yo û demêk kilm mend. Namzetê heme partîyan dîyar bîyî. Partîya Têduştîye û Demokrasîyî yê Şaran (DEM Partî) sey partîyê bînan nêkerd. Herinda ke merkez namzetan biweçîno bi rayê şarî, bi verweçînayîşêk namzetanê xo dîyar kerd. Îdîayê tewr pîl no yo ke şaredarîyan newe ra teslîmê şarî bikerê. 

 

Qezaya Cizîrî ya Şirnexî de 16ê Çeleyî de raydayîşê şarî pê ame û Guler Tunçe ameye weçinayiş. Gulere wextê qedexeyê Cizîrî de lajê xo Bêkes ard dinya û wina yena naskerdiş. Gulere tena bi naskerdişê dadîya Bêkese nîna zanayîş demêk zî hemserekatîye kena û dima ra aktîvîstîya TJAye kena. Gulere hem bena vengê cinîyan û hem zî vera qirkerdişê şarê Cizîrî ke meşru yeno mojnayîş reaksîyon nîşan dana. 

 

Guler Tunçe derheqê problem û projeyê xo de qisey kerd. 

 

 Şînê xo açarna xoverdayîşî 

 

Gulere da zanayîş ke serra 2016î de dimayê îlankerdişê rayîrberîyê xoserî û qirkerdişê bodrumê Cizîrî, sey cinîyêk ciwan sey dadîyêk herinda ke şîn bigêra vera qirkerdişî de têkoşîn daya û têkoşînê xo raşteyê sîyasetî de rayîr ra berda. Gulere ard ziwan ke heta 2021î hemserekatîya Cizîrî kerda, dimayê di serran aktîvîstîya TJAye kerda. Gulere wina dewam kerd: “Raydayîşê şarî de şarê ma, mi ercayeyê nê wezîfeyî dî. Wexto ke Cizîr yeno vatiş barêk giran keweno milê merdimî ser. Nameyê ci zî giran o. Cizîr kaleyê xoverdayîşî yo. Serra 90î ra heta nika şahidîya xoverdayîş û qirkerdişan kerd û qet sere çewt nêkerd. Ma zî ciwanê na herre têkoşînê xo rayîr ra benê. Zerrîya Kurdistan Cizîr de erzeno.”

 

 ‘Ma do şaredarîyan newe ra bigîrê’ 

 

Gulere dîyar kerd ke bi serran o bi qeyûman îradeyê şarî yeno xespkerdiş û vat: “Çîyo ke qeyûm keno tena xespkerdişê şaredarîyan nîyo. Qeyûman raşteyê cuya cinîyan, ciwanan û tutan bi temamî çinî kerd. Wazenê şar bê alternatîf bimano. Roja ke qeyûm ameyo ra nata tena texrîbat ameyo kerdiş. Zîyaretan de esnaf vanê ‘şima şaredarîyêk normal nêgînê’. Tebîî ma zî zanê. Wexto ke qeyûm yenê bi xo reyde polîtîkayê şer, rantî zî kenê cuye. Yewine xizmeto ke qeyûmê Cizîrî kerd daliqanayîşê posterê Erdoganî yo. Sewbîna şerêke psîkolojîk zî rayîr ra berd. Heme raşteyê cinîyan, ciwanan dizna. Heme raşteyê cinîyan ke ci ra hetkarî girewtêne, girewt. Serra 2014î de Cizîr de Sitîya Zîn ame awankerdiş. Nê raşteyî de seba cinîyan atolye estbî. La qeyûm senî ke ame girewt.”

 

 ‘Ma do bikerê qezaya cinîyan’ 

 

Gulere ercnayîşê xo bi qalîkerdişê projeyê xo dewam kerd û vat: “Xeylê projeyê ma est ê. Ewil ma do merkeze şêwirmendîye bikerê cuye. Ma do bazarê keda cinîyan awan bikerê. Ma do parqê aîdê cinîyan awan bikerê. Cizîr de 17 taxê ma est ê. Nê taxan de seba ke cinîyê ciwan kulturê xo ra dûrî nêkewê ma do raşteyê kulturî awan bikerê. Ma do seba cinîyan stargehan akerê. Ma do mêvanxaneyan awan bikerê. Cinî do nê stargehan de seke keyeyê xo de bî rehet bikerê. Ma do perwerdehîyê hişmendîya cînsîyetê komelî pê bîyarê. Ma do seba têkoşînê vera tîryakî AMETEM awan bikerê. Ma do problemê binesazîya qezaye çareser bikerê. Cizîr serra 90î de bi Berîvanan newera ame awankerdiş. Îdîayê ma zî no yo ke ma qezaye newe ra bikerê qezaya cinîyan.” 

 

Vera qirkerdişê xozaye de kampanyaya ‘her keyeyêk darêk o’ 

 

Gulere ard ziwan ke vera qirkerdişê xozaye de zî projeyan amade kenê dîyar kerd ke 4 serrî yo Cudî û Gabar de qirkerdişê daran dewam keno û vat: “Eke şansê ekolojîstan bibayêne ke şêrî Cudî û Gabarî do nê qirkerdişî bimojnayêne dinya. Cizîr de raşteyê cuye kêm ê. Hamnanî merdim germ ra nêeşkeno biciwîyo. Coka ra hedefê ma yê yewine no yo ke bi kampanyaya ‘her keyeyêk darêke’ ma Cizîr açarnê raşteyê şînayî.” 

 

‘Ma do bi renge xo awan bikerê’ 

 

Gulere qiseykerdişê xo yê peyênan de wina vat: “Ma do dês û barîkatê ke verê şaredarîye de ameyî ronayîş wedarnê. Şarê ma zano kesê mîyanê nê awanîyan îradeyê înan o. Şar semedo ke îradeyê înan ameyo xespkerdiş nêşino şaredarî. Şêrî zî zanê ke cewabê înan nîno dayîş. Ma do şaredarîya ke bi sîyayan ameya piştiş newe ra û bi rengê xo awan bikerê.”