Elfazî Toral

 

STENBOL - Pispora Anestezî û Reanîmasyonî Dr. Rukîye Ekenlere bale ant serê muhîmîya çalakîya grevê vêşanîye yê tepişteyan û dimayê çalakîye rewşa înan ya weşîye. Rukîye vat: "Ganî zîndanî sey cayê heyfgirewtişî û nefretî nêrî dîyîş. Eke ma hîsin têbigêrî ma eşkenê embazanê xo yê tepişteyan bidê ciwîyayîş.

 

Seba azadîya fîzîkî ya Rayberê PKKyî Abdullah Ocalanî ke 26 serrî yo Girava Îmraliyî de binê tecrîdêk girankerde de yeno tepiştiş û 35 aşmî yo tu xeberêk ci ra nîna girewtiş, heme hetî têkoşînêk bêmaben rayîr ra benê. Çarçeweya hemleya "Abdullah Ocalanî rê azadî, problemê kurdî rê çareserîya sîyasî" de tepişteyê sîyasî yê zîndananê Kurdistan û Tirkîya 27ê Teşrîna Peyêna 2023yî de dest bi grevê vêşanîye kerdî. Merdimê tepişteyan zî bi eynî waştişî xeylê bajaran de çalakîya Nobeda Edaletî dayî destpêkerdiş û çalakîya înan dewam kena. Çalakîya ke bi qerardarîyêk pîl dewam kena, heme pêameyan ra paştîdayîş gêna. Çalakîya Nobeda Edaletî ya ke hetê merdimê tepişteyan ra 13ê Kanûna 2023yî de bi serkêşîya Komeleya Hetkarî û Paştîdayîşê bi Keyeyê Tepişte û Hukmweran Reyde ya Marmaraye (MATUHAYDER) Stenbol dîyabî destpêkerdiş, roja 67ine de bi qeradarî dewam kena. 

 

Yew kesê ke paştîdayîş da çalakîya nobede Doktora Pispore ya Anestezî û Reanîmasyonî Doktor Rukîye Ekenler a û Rukîyeye derheqê tepişteyê nêweş û grevê vêşanîye de ajansê ma rê qisey kerd.

 

'Ez paştîdayîş dana nê xoverdayîşî’ 

 

Rukîye da zanayîş ke rewşa weşîya tepişteyê nêweşî yê ke grevê vêşanîye de yê, giran bena û wina vat: “Lazim o Wezîrê Edaletî êdî hîsin bo. Ez hem kişta tepişteyan û hem zî kişta nobedarê Edaletî de ya. Ez do kişta dadîyan de ronişa û înan reyde têkoşîn bikera. Ez zî paştîdayîş dana nê xoverdayîşî. Ma wazenê heta peynî kişta dadîyan de bê. Ma hem seba paştîdayîşê têkoşînê înan û hem zî vengê xo bidê eşnawitiş tîya de yê. Dadî tena seba tutanê xo nê, seba Tirkîyayêke demokratîke û destkewtişêk muhîm bi dest bifînê têkoşîn kenê û no têkoşîn yê ma heme şaran o." 

 

Venga hîsgerîye ame kerdiş 

 

Rukîye dîyar kerd ke xoverdayîş pêroyê dinya ser de tesîr viraşto û wina vat: “Taybetî zî zîndanan de tesîrêk gird est o. Seba ke her kes bieşko nefes bigêro ganî pîya têkoşîn bikero. Cinî, dadî û merdimê tepişteyan ê ke grevê vêşanîye de yê tesîrêk gird mi ser de virazenê. Tîya de her kes wayîrê hîkayeyêk cîya yo. Coka ra her kes na çalakîye de ca gêno. Ganî zîndan nêbê cayê heyfgirewtiş û nefretî. Ganî merdimî bieşkê xo biresnê keyeyê xo. Tecrîd sucê merdimîye yo. Tepişteyê zîndanan çi deste înan ra yeno, kerdî û hema zî kenê. Çîyo ke tepişte eşkenê bikerê tena grevê vêşanîye yo. Na rewşe vera zaf hîsin a. Hêvî kena ke no proses demêk kilm de peynî bibo ke hema kesêk zirar nêdîyo. Ganî vengê înan girseyêk pîl de bêro eşnawitiş. Ganî Odeya Tabîban na babete de hîsin biba. Ez soz dana ke çi destê mi ra bêro ez do bikera.” 

 

'Seba grevê vêşanîye wext xeylê muhîm o' 

 

Rukîye vist vîr ke serranê 90an de zî grevê vêşanîye ameyêne kerdiş û vat: “A roje ra nata çi heyf o ke welatê ma de ge-ge grevê vêşanîye yê zaf giran ameyî kerdiş. Embazê ma yê avukat zî dinyaya xo bedelnayî. Avukate Ebru Timtike dinyaya xo bedelnaye. Embazê ma yê ke grevê vêşanîye de yê, lazimîya înan bi paştîdayîşêk zaf taybet est o. La sey her grevê vêşanîye wext zaf muhîm o. No prosesî de muhîm o ke grevê vêşanîye netîce bigîrê ke merdimî biciwîyê. Eke wext derbaz bibo, her çend ke tepişte biciwîyî zî, beno ke no pêroyê cuya înan de problemê cidî yê weşîye bimanê. No hîkayeyêk zaf bi dejin o. Ganî no felaket bi lezkî peynî bibo.” 

 

'Yewine çareserî wedaritişê tecrîdî yo' 

 

Rukîye qiseykerdişê xo yê peyênan de veng kerd ke ganî nobedê edaleyî tena nêrê verdayîş û wina vat: “Ganî kişta dadîyan de bibê. Çike dej wexto ke yeno parekerdiş kêm beno. Çîyo ke dadîyan zaf bextewar keno eşnawitişê vengê tutanê înan o. Ganî rêxistinê sivîl, cinî û her kes hîsin paştîdayîş bido na çalakîye. Wazenê no prosesê verê ke zirar nêdayo kesêk, bi lezkî peynî bibo. Çike yewine çareserî caardişê waştişê tepişteyan o. Peynîkerdişê tecrîdî yeno manaya awankerdişê prosesêk newe yê sîyasî.”