Elfazî Toral

 

STENBOL - Cinîyê ke paştîdayîş danê Nobeta Edaletî dîyar kerdî ke şarê kurdî bi têkoşînê xo komployê mîyanneteweyî veng vetî û wina vat: “Dimayê komployî ma têkoşînê xo hîna berz kerd. têkoşînê meşru yê şarê kurdî vera dewam keno. Bîyayîşê ma serek û tutê ma yê. Kilîtê aştîye deste serekê ma de yo. Ma do biresê hedefe xo û ser bikewê.” 

 

Komployê mîyanneteweyî yê 15ê Sibate ke hemverê Rayberê PKKyî Abdullah Ocalanî de pê ame, kewt serra 26ine. Abdullah Ocalan a roje ra nata binê tecrîdî de yo û 35 aşmî yo ci ra tu xeberêke nîna girewtiş. Kurdistan, Tirkîya û xeylê cayanê dinya de çalakîyê protestokerdişî dewam kenê. Na çarçeweya de 10ê Teşrîna Verêne ya 2023yî de kampanyaya ‘Abdullah Ocalanî rê azadî, problemê kurdî rê çareserîya sîyasî’ dîya destpêkerdiş û 27ê Teşrîna Peyêne de zîndanê Kurdistan û Tirkîya de grevê vêşanîye bi eynî sloganî dîyayî destpêkerdiş. Bi eynî waştişan bi serkêşîya merdimê tepişteyan çalakîya "Nobeda Edaletî" dîya destpêkerdiş. Sewbîna 1ê Sibate de zî "Rayîr ra Şîyayîşê Pîl ê Azadîye" Qers û Wan de rayîr ra şîyayîş dîya destpêkerdiş. 

 

Cinîyê ke paştîdayîş danê Nobeta Edaletî derheqê komplo, tecrîdî de JINNEWSî rê qisey kerdî. 

 

 ‘Kilîtê aştî û edaletî Serekê ma de yo’ 

 

Suphîye Teymurtaşe da zanayîş ke no tecrîdo giran ê serê Rayberê PKKyî Abdullah Ocalanî qebûl nêkenê û wina vat: “Çîyo ke bi Serekê ma yeno kerdiş bêhuqûqî yo. Ganî îqtîdar vera grevê vêşanîye de bêveng nêmano. No wezîfeyê merdimîye yo. Ganî heme şar paştîdayîş bido nê hemleyî. Ganî heme wayîrê grevê vêşanîye û Nobetê Edaletî bivejê. Kilîtê aştîye destê Serekê ma de yo.”

 

 ‘Ma do zincîrê Îmraliyî bişikinê’ 

 

Suphîye dîyar kerd ke zincîrê Îmraliyî do bişikinê û wina dewam kerd: “Heta peynîya cuya xo ma do edalet bipawê. Ma nasnameyê xo wazenê. Ma venga heme dadîyanê leşker û polîsan kenê. Wa bêrê ma dest bidê yewbînan. No problem bê Serekî çareser nêbeno. Wa baş bizanê. Ma do nê zilmî bişikinê. Ma do tecrîdê Îmraliyî bişikinê. Ma do tutanê xo azad bikerê.” 

 

Seba demokrasîyî venga têkoşînî 

 

Ayşe Sarihane zî ard ziwan ke xoverdayîşê şaranê ke têkoşînê azadîya şarê kurdî de ca gênê, muhîm o û wina dewam kerd: “Ez ameyîşê têhet yê şaran ercaye vînena. Têkoşîno ke yeno rayîr ra berdiş tena yê şarê kurdî nîyo. Ganî bi hawayêkê topyekun têkoşîn bêro honayîş. No têkoşîn ê ma hemeyan o. Ganî no zilm nêro qebûlkerdiş. Tutê ma her roje yenê qetilkerdiş. Bê suc yenê qetilkerdiş yan zî yenê tepiştiş. Ma têkoşînê xo nêdê, ma do ser nêkewê. Ganî ma heme seba demokrasîyî têkoşîn bikerê.”

 

 ‘Yewine çareserî Serek o’ 

 

Ayşe da zanayîş ke do têkoşînê xo yê vera tecrîdî dewam bikera û wina qiseykerdişê xo peynî kerd: “Ma do vera tecrîdî de bêveng nêmanê. Cinî, ciwan, tepişteyî têkoşîn dewam kenê. Ma zî tîya de têkoşînê xo kenê. Hêzê ma ewro mirde her çîyî keno. Ganî ma têkoşînê xo pîl bikerê. Ganî heme şar xover bido û serê payan de bimano. Ganî bi Serekî reyde bi lezkî pêvînayîş bêro kerdiş. Yewine çareserî Serek o.” 

 

Xoverdayîşê şarê kurdî 

 

Nesrîn Avciye zî dîyar kerd ke heta tecrîd nêro şikitiş do tu çareserîyêk zî pê nêro û wina dewam kerd: “Heta şarê kurdî asayîş de nêbo kes asayîş de nêbeno. Ez komployî lanet kena. Roja ke komplo pê ameyo ra nata şer giran bîyo. Şarê kurdî yenê tepiştiş, bombardumankerdiş. La şarê kurdî her ca de xover da û têkoşînê xo rayîr ra berd. Komplo nêresa amancê xo. Şarê kurdî no komplo veng vet. Bi kiştiş û qetilkerdişî do tu rey nêresî amancê xo. Do têkoşînê ma netîce bigîro. Do serkewtiş yê ma bo. Ma do biresê hedefê xo û ser bikewê.”