Şehrîban Aslan

 

AMED - Halîse Aksoya ke cenazeya lajê aye Agît Îpekî bi kargo teslîmê aye ameybî kerdiş, vera heme tedayan têkoşînê xo rayîr ra berd û dima ra ameye tepiştiş. Halîseya ke nika tepişteya wirdî roniştişanê xo de da zanayîş ke tepîya game nêerzena. 

 

Agît Îpeko HPGyîj 23yê Gulana 2017î de Dêrsim de pêrodayîşêk de dinyaya xo bedelnaye. Vera heme lebate, keyeyî rê cenaze nêameye dayîş. 2yê Adara 2020î de cenaze bi kargo teslîmî dadîya ci Halîse Aksoye kerdî.

 

Komeleya Heqanê Merdiman (ÎHD) ya Amedî, Baroya Amedî, temsîlkarîya Weqfê Heqanê Merdiman ê Tirkîya (TIHV) ya Amedî û Halîseye Serdozgerîya Komare ya Amedî de derheqê selahîyetdarê Serdozgerîya Komare ya Dêrsimî de muracatê sucî kerd. La tehqîqato ke Serdozgerîya Komare ya Dêrsimî de ameyêne rayîr ra berdiş, bi bêtaqîbî netîce bî. 

 

Halîseye reyna îtîrazê qerarî kerd. Cuya Halîse Aksoya ke bi şirawitişê cenazeya lajê xo yê bi kargoyî yena naskerdiş, yew nimuneyê cuya dadîyê kurd a. 

 

Dewa înan hetê leşkeran ra yena veşênayîş 

 

Halîse dewa Tizyanî ya Artukluyî ya Mêrdînî de yena dinya. Emrê xo yê şenik de yena zewecnayîş. Serranê 90î de şahidîya veşênayîşê dewan û tedayan kena. Laje aye Agit serra 1992yî de yeno dinya. Bado ke dewî yenê veşênayîş bi 8 tutanê xo reyde koçê Stenbolî kenê. Camêrdo ke Halîseye reyde zewecnayebî Halîse û tutanê xo terk keno. Cuye tîya ra pê seba Halîseye hîna bena zehmetin.

 

Bi desan reyan yena tepiştiş 

 

Lajê aye Agît bi desan reyan yeno destbendkerdiş, derbkerdiş. Agitî tedaye vera serra 2010î de şino û ancî reye nîno. Dimayê Agitî her tim polîsî erzenê keye ser û gêrenê. Halîseye tutanê xo gêna û şina Mêrdîn û dima ra zî yena Amed de bi ca bena. Serra 2010î de xebere lajê xo Agîtî ra gêna ke dinyaya xo bedelnayo. Şina Dêrsim. Bi desan reyan muracat kena. La cenazeya lajê aye nêdîyena. 10ê Nîsane de bi kargoyî esteyê lajê aye şirawîyenê. 

 

Îşkence bi ci yeno kerdiş 

 

23yê Kanûna 2020î de reyna sereştişê keyeyê Halîseye virazîyeno. Bi bahaneyê ke ‘îxbarê’ endamê MYK HDPyî meymanê aye est ê, polîs erzenê keyeyê aye ser. Berê keye yeno şikitiş. Halîse bi 5 kesî reyde yena derbkerdiş, sereyê meymanê aye yeno şikitiş. 5 saetan cigêrayîş keye de yeno kerdiş. dima ra yena destbendkerdiş û 4 saet ra dima serbest yena verdayîş. 

 

Serra 2022yî de sereştişê keyeyan virazîyeno. Sereştişê keyeyê Halîseye zî yeno kerdiş. Polîs kênaya Halîseye rê vano ‘dadîya to tena manena? Ameyîş û şîyayîş est o yan nê? No parfumê kamî yo? Kitabê ke tîya de yê dadîya to wanena’. 

 

18ê Gulana 2022yî de reyna sererştişê keyeyî de yena destbendkerdiş. Reyna Halîse keye de nêbena. Polîs cîranê Halîseye rê vanê ‘Bi raştî cenazeya Agît Îpekî bi kargoyî ameye şirawitiş? Çîyêk wina est o?’. 

 

Tewr peynî Halîse çarçeweya tehqîqatê serdozgerîya komare ya Amedî de 25ê Nîsana 2025î de serê îfadeyê şahido eşkera Umît Akbiyikî yena tepiştiş. Îdianameyo ke ame amadekerdiş de têkilîya kênaya aye û avûkatê aye reyde kerdî babeta sucî û 15 serrî ceza waştî. 

 

Îdianame hetê 10ine mehkemaya cezaya girane ya Amedî ra ame qebulkerdiş. Roniştişê ewil ê dewaye 6ê teşrîna verêne ya 2023yî de ame dîyîş. Umît Akbiyik bi SEGBÎSî tewrê roniştişî bî. Halîseye sucdarkerdişan qebul nêkerd. 

 

Roniştişê diyîne 12ê Çeleyî de ame dîyîş û vera heme nêweşîyan qerarê tahlîyekerdişî nêvejîya û roniştiş taloqê 19ê Nîsane ame kerdiş. 

 

Avûkatê Halîseye venga wayîrvejîyayîşî dewaye kerd û vat ke wa heme rayaumûmî bi hîsgerî têbigêro.