AMED - Cinîyan reaksîyon vera polîtîkayê bêcezaverdayîşî yê qetilkerdişê cinîyan mojnayî û vatî ke kiştişê cinîyan her tim est o û sebebê ci zî bêcezaverdayîş o. Cinîyan bale ant serê têkoşînê rêxistinkerde û vatî ke wa cinî xo dewlet û camêrdî ra bipawa. 

 

Kurdistan û Tirkîya de bi xeberê çapemenîya hetgiran qetilkerdişê cinîyan sey çîyêk normal yeno mojnayîş û bi taybetî kerdoxî muhakeme û vatişê îqtîdarî yê vera cinîyan ra cesaret gênê û înan kenê hedefe xo. Têkoşînê hempar ê cinîyan ê vera camêrd-dewlet-muhakemeyî de dewam keno. Cinîyan derheqê nê de ercnayîşê xo ardî ziwan.

 

‘Cinî do fek têkoşînî ra vera nêdê’ 

 

Endama Meclîsê Şaredarîya Peyasî Zeynet Ozdemîre dîyar kerd ke polîtîkayê bêcezaverdayîşî û fînayîşê cezaye ya rewşa başî ra cesaret dîyeno camêrdan û wina dewam kerd: “Şerê camêrd û cinîyan şerê tewr pîl ê dinya yo. Camêrdê tewr demokrat zî nêwazenê ke cinî azad biba, aver şêra. Ma heme nê çîyî ciwîyenê. Ma eşkenê cuya xo ra nimune bidê. Mêrdeyê mi ‘demokrat o’ la wexto ke mi newe raşteyê sîyasî de dest bi xebate kerd, vatêne ‘ez bi nîyetêk baş vana ti nêeşkena bikera’. Bingehê na çekuye de zîhnîyetê serdest est o. Hema zî bi mêrdeyê mi de est o. Xeylê bar keweno serê mile mi. Cinî do fek têkoşînî ra vera nêda. Eke verda do bêra pelçiqnayîş.”

 

 ‘Ma eşkenê pîya ser bikewê’ 

 

Zeynete da zanayîş ke çapemenîya hetgire ziwanêk ke qetilkerdişê cinîyan normal nîşan dano, şixulnena û wina qiseykerdişê xo peynî kerd: “Cinî pîya do têkoşînî pîl bikerê. Ganî cinî mîyanê paştîdayîşî de bê. Rolo ke keweno serê milê dewlete no yo ke polîtîkayê bêcezaverdayîşî raşte ra wedarno. Ganî dezgehê ferzî bêrê aktîfkerdiş. Ganî cinî wayîrê dezgehan bivejê. Ma eşkenê netîceyê têkoşînî de ser bikewê.”

 

 ‘Wa cinî xo dewlet û camêrdî ra bipawa’ 

 

Dadîya Aştîye Meryem Turane zî dîyar kerd ke dewlete camêrdê ke cinîyan qetil kenê rê ceza nêbirnena, la komelî semedo nasnameyê înan vera muhakeme keno. Meryeme wina dewam kerd: “Camêrdî xeylê teda bi cinîyan kenê. Heqaret kenê. Ma nêwazenê cinî bêrê qetilkerdiş. Wa cinî vera camêrdan de sere wedarnê. Dewleta tirke her çîyî da destê camêrdan. Nimune cinîyêke yena qetilkerdiş, kiştox nîno cezakerdiş, nîno muhakemekerdiş. Kiştişê cinîyan wina zêde beno. Wa cezayê giran kerdoxan rê bêrê dayîş. Wa cinî xo camêrd û dewlete ra bipawê.”