MERKEZÊ XEBERAN - Kampa Multecîyan a Şehîd Rûstem Cûdîyî (Mexmûr) de çarçeweya çalakîyanê seba 15ê Sibate de seba azadîya Rayberê Şarê Kurdî Abdullah Ocalanî grevê vêşanîye dest pêkerd. 

 

Kampa Multecîyan a Şehîd Rûstem Cûdîyî (Mexmûr) 1ê Sibate de startê çalakîyê 15ê Sibate da. Çarçeweya çalakîyan de seba şermezarkerdişê Komployê Mîyanneteweyî çalakîya Nobeta 3 rojan açarîya çalakîya grevê vêşanîye. Dimayê deqeyêk rêzgirewtişî eşkerayî hetê Hemserekê Meclîsê Şarî yê Mexmûrî Yusuf Kara ra ame wendiş. 

 

‘Kesêk nêeşkeno roja ma tarî bikero’ 

 

Yusuf Kara Komployê Mîyanneteweyî yê vera Rayberê PKKyî Abdullah Ocalanî şermezar kerd û wina vat: “15ê Sibate seba şarê kurdî sey rojêka sîya ya. Hezê ke waştî Rojhelatê Mîyanênî û dinya planê xo pê bîyarê, vera Rayber Apoyî de komployêk mîyanneteweyî pê ardî. Bi desan ciwanê ma seba ke no komplo sernêkewo vatî ‘Kesêk nêeşkeno roja ma tarî bikero’ û canê xo feda kerdî. Do komploger, faşîşt û xayîn nêresê amancê xo. Çîyo ke bireso amancê xo do heqîqet, raştî, felsefe û pradîgmaya Rayber Apoyî bibo.”

 

 ‘Tecrîdêk girankerde est o’ 

 

Yusuf Kara da zanayîş ke no 3 serrî yo xeberêke Abdullah Ocalanî ra nîna girewtiş û wina vat: “No demêk dergo ke seba birnayîşê têkilîya şarî û Rayberî tecrîdêk girankerde est o. Ganî ma nê tecrîdê girankerde bişiknê, coka ra zî ganî heme şarê kurdî wezîfe û berpirsîyarîya xo pê bîyaro û azadîya fizîkî ya Rayberê xo meşru bikero.” 

 

Yusuf Karayî dîyar kerd ke seba şermezarkerdişê Komployo Mîyanneteweyî çalakîya Nobete ya 3 rojan açarnayî çalakîya grevê vêşanîye û vat: “Ganî 7 serrî ra heta 70 serrî her kes na hemleye de ca bigêro û têkoşînêk bêmaben rayîr ra bero. Ma sey şarê Mexmûrî demêk dergo ke mîyanê hemleye de çalakîyan de ca gênê û ma wazenê bi îradeyêk pîl çalakîya xo pîl bikerê. Coka ra ma do çalakîya xo ya nobete ya ke ma dabî destpêkerdiş, seba hîrê rojan yanî heta 15ê Sibate açarnî grevê vêşanîye û dima yê 15ê Sibate ma do çalakîyê cîya cîyayî pê bîyarê. Ma şarê kurdî bi felsefe û paradîgmaya Rayberî azadî bîyarê. Seba azadîya Rayber Apoyî çalakîyê ma do tim dewam bikerê.” 

 

Qiseykerdişê Yusufî ra dima şarî bi sloganê ‘Bijî Serok Apo’ ‘Bê Serok jiyan nabe’, “Kesêk nêeşkeno roja ma tarî bikero” dest pê grevê vêşanîye ame kerdiş. 

 

Dimayê eşkerayîye çalakîkerî grevê vêşanîye çalakî dewr girewtî.