ÊLIH - Cinîya ciwan a bi nameyê Rojvelat Kizmaz 9ê sibate ra Êlih de vînî bîbî. Ewro cenazeya Rojvelate ameye vînayîş. 

 

Cinîya ciwan a bi nameyê Rojvelat Kizmaz 9ê Sibate ra Taxa Petro ya Êlihî de vînî bîbî û ewro cenazeya aye ameye vînayîş. Cil û belgê Rojvelate verê Barajê Heskîfî de amebî vînayîş û ewro zî cenazeya aye uca de ameye vînayîş. 

 

Cil û belgê Rojvelat Kizmaz vizêr saetê şanî de netîceyê hewldayîşê keyeyî de kîşte gola Barajê Heskîfî amebî vînayîş. Birayê Rojvelate, rojnameger Mehmet Kizmazî Ajansê Mezopotamyaye (MA) rê qisey kerdibi û wina vatibi: “9ê sibate ke waya mi vînî bî, ma agahî da qereqol û emniyetê bajarî. La heta nika keyeyê ma nêgerayî. Ma hîrê rojî de her cayê Êlihî de gêrayî. Ma emniyetî ra vat beno ke waya ma şêro Heskîf û roja vînî bîya de ma ci ra vat. La ma bi xo ewro tespît kerd ke şîya Heskîf. Ganî mudûrîyê emniyetî yê Heskîfî agahî bidayîne cendirmeyan zî la ma bi xo ewro înan ra vat. Dima ra zî ma bi xo Heskîf, rexmê Dîcleyî de gêrayî. Ma bi xo cilê aye verê awe de dî. Ma waşt ke keştîya cigêrayîşî awe de cigêrayîş bikero la ma ra vatî, ‘qaptanê keştî teberê qeza de yo.’ Dimayê ke ma cil û belgê ci uca de dîyî, na rey hema newe dest bi xebate kerdî.” 

 

Dimayê xebatê ekîbê cigêrayîşî cesedê Rojvelate derûdorê saete 11.00an de Barajê Ilısuyî de ame vînayîş.