Rojda Aydin - Oznur Deger

 

MÊRDÎN - Dadîya Sêvê Demîre, Sakîne Demîre ya ke Manîsa ra tewrê “Rayîr ra şîyayîşê Pîl ê Azadîye” bî dîyar kerd ke hewno ke di serrî verê cû dîya vera tewrê “Rayîr ra şîyayîşê Pîl ê Azadîye” bîya û vat: “Ganî tirkî zî tewrê nê rayîr ra şîyayîşî bibê û ma pîya waştişê azadîye bikerê. Lazim o paştîdayîş bidê ma, ma tecrîdî peynî bikerê û aştî bîyarê serê na herre.” 

 

“Rayîr ra şîyayîşê Pîl ê Azadîye” ke 1ê Sibate de bi di baskan Wan û Qersî ra seba azadîya Rayberê PKKyî Abdullah Ocalanî dîyabî destpêkerdiş, roja xo ya 11ine de dewam keno. Raywanê ke Wan, Colemêrg, Şirnex û Mêrdînî ra bi girseyî ameyî pêşwazîkerdiş, têkilîyê xo yê bi şarî redye dewam kenê. Yew çalakîkera rayîr ra şîyayîşî zî dadîya Sêvê Demîre ya ke qezaya Silopya ya Şirnexî de ameybî qetilkerdiş, Sakîne Demîre ya.

 

Mi hewnê xo de rayîr ra şîyayîş û aştî dî

 

Sakîneya ke Manîsa de beşdarê rayîr ra şîyayîşî bî, sebebê ci hewnê ke di serrî verê dîbî yo. Sakîne, ard ziwan ke hewnê xo de Sêvê dîya û hewnê xo wina vat: “Di serrî verê hewn de Sêvê mi ra vatibi ke ‘ganî ti tewrê rayîr ra şîyayîşî bibê.’ No rayîr ra şîyayîş di serrî verê bi, ganî di serrî verê dest pêbikerdêne. Sêvê şewa îne di rey kewte hewnê mi. Mi ra vatêne, ‘Ti çira rakewena, wurze, şarê Wanî rawuşto, paweyê to yê. Mi vatêne, baş o, la nêzana çira paweyê min ê. Mi nêzanayîne do no rayîr ra şîyayîş dest pêbikero.  Hewteyêk dima şanê îne de mi ancî eynî hewnî dî. Ancî Sêvê vat, “Wurze, şarê Wanî rawuşto û rayîr ra şino, paweyê to yê.’ Wexto ke ez serê sibayî rawuşta, mi hewl da ke hewnê ke mi dîyo, şîrove bikerî. La mi baş fam nêkerd ke waştişê aye çî yo. Dima ra reya hêrîne hewnêk wina mi dî. Na rey mi hewnê xo de kesêk bîn dî. Kefîyêke kesk û sûr û zerd dabî sereyê xo. Destê xo dergê mi kerd û vat, ‘Ma rayîr ra şêrê.’ Ma berêk qij ra derbaz bîne û gama ke ma kewtî zere, her ca hîra bîne. Zere de fotografê Serek Abdullah Ocalanî estbî. Fotograf mojna min û vat, ‘Tenê no rayber eşkeno dejo ke şima hende anto peynî bikero.’ Mi zî vat, ez zî nê wazena. Dima ra ma vejîyayî teber û teber de girseyêk pîl estbî. Merdeyî vejîyayîne, gerîla koyan ra ameyîne warî, her kes bi fotografanê Rayberî teber de bî. Vatêne aştî pê ameya û Rayber azad o. Uca de ez hewnî ra aya bîya.”

 

 

‘Ganî tirkî zî tewrê rayîr ra şîyayîşî bibê’ 

 

Sakîneye ard ziwan ke manaya xeyalê aye estbî, la aye nêzanayêne çi bî û dîyar kerd ke dimayê destpêkerdişê “Rayîr ra Şîyayîşê Pîl ê Azadîye” pê hesîyaya ke hewnê aye no rayîr ra şîyayîş bî. Sakîneye da zanayîş ke hetê wijdanî ra rehet nê bî û qerar daya ke bi no hawa tewrê rayîr ra şîyayîşî biba û vat ke aye Silopîya ke kênaya aye Sêvê uca de ameye qetilkerdiş ra tewrê rayîr ra şîyayîşî bîya. Sakîneye dîyar kerd ke “Rayîr ra şîyayîşê Pîl ê Azadîye” tena seba kurdan nê, seba heme şaran o û wina vat: “Ganî tirkî zî tewrê rayîr ra şîyayîşî bibê. Ganî her kes waştişê azadîye bikero. Ganî her kesê zerrîşikite û zerrî deje tewrê nê rayîr ra şîyayîşî bibê. Lazim o ê paştîdayîş bidê ma û ma pîya tecrîdî peynî bikerê û aştîye bîyarê serê na herre.”

 

‘Sêvê di serrî verê cû mi rê vatbî…’ 

 

Sakîneye tedaya polîsan zî ercnaye û vat: “Ma xeylê teng bîyî, la ma bi coş rayîrê xo dewam kerd. vera tedayan zî rayîr ra şîyayîşê ma derkewte dewam keno. Heta Cizîr, Silopîya, Hezex, Nisêbîn, Qoser û Dêrîkî ma aver şîyî. Dîyar bî do bi mîlyonan tewrê tewrê nê rayîr ra şîyayîşî bibê. Ma nê rayîr ra şîyayîşî rê erê mendî. Sêvê di serrî verê cû mi rê vatbî ganî ma dest bi rayîr ra şîyayîşî bikerê. La reyna zî baş derbaz beno. Şar wirzeno serê payan. Tepişte û keyeyê înan xover danê. Her kes xover dano. Ganî êdî her kes vano êdî bes o. No rayîr ra şîyayîşê azadîye seba rizgarî û azadîya her kesî yo. 15ê Sibate de ganî her kes deste xo bido yewbînan û wirzo serê payan. Ganî aştîyêk daîmî pê bêra. Na rewşe êdî bi gonî û şerî nêvindena. Lazim o Rayberî serê maseye de ronişo û problem çareser bibo. Ma tedaya dewlete nas nêkenê. Ma do ser bikewê. Yan azadî yan azadî.”