Nazlican Nûjîn Yildiz 

 

WAN - Derheqê hemsereka KCDyî Leyla Guvene de seba îfadeyê "AKP-MHP do hesab bido" û "Seba hesab bidê, ma do xo ver bidê" bi îdiayê "Şarî tahrîkê dişminî û kîn kena" dewa ameye akerdiş. Sîyasetmedaran reaksîyon vera rewşe mojnayî û dîyar kerdî ke şexsê Leylaye de wazenê heyf cinîyan ra bigîrê.  

 

Hemsereka Kongreya Komeleya Demokratîke (KCD) Leyla Guven ke zîndanê Cinîyan ê Elezîzî de tepişyaye ya, bi îdiayê "Şarî tahrîkê kîn û dişminayî kerda" dewa ameye akerdiş. Seba qiseykerdişê 18ê Kanûna 2020 de Sîlopîya yê Şirnexî serdozgerîya Komare ya Sîlopîya îdianame amade kerd û hetê 3ine Dadgeha ceza ya hetê Sîlopiya ra ame qebûlkerdiş. Cinîyê sîyasetmedarî derheqê rewşe de ercnayîş kerdî û vatî, AKP-MHP vinderdtişê cinîyanê kurdan ra terseno.

 

Hemsereka Partîya Herêma Demokratîke (DBP) ya Wanî Şengul Polat da zanayîş ke cipersayîşê Leyla Guvene ameyo destpêkerdiş, seba polîtîka û zextê hemverê têkoşînê azadîya cinîya kurde de pê ameyo û vat: "No cipersayîş şexsê pêro cinîyanê Tirkîya de pê ameyo. Wazenê cinîyan bi her hetî de çin bikerê. Cezaya şexsê Leyla Guven de ameya dayîş, pêro cinîyanê kurdan rê ameya birnayîş. Leyla Guvene kesêke ke têkoşînê azadîya cinîyan temsîl kena ya. Ma hukmê bîyaye vînanê. Pêro polîtîkayê hemverê cinîyan, girêdayeyê yewbînanê."

 

‘Hemverê tecrîdî de gama ewilî cinî erzenê'

 

Şengule dewam de wina vat: "Têkoşînêk cinîyan ke na polîtîkaya tecrîdî qebûl nêkena esta. Leyla Guven 2019ine de kewte grevê vêşanîye û hedef ameye girewtiş. Grev de bi desan kesî ganê xo dabî. Ewro hema zî polîtîkaya tecrîdî dewam kena û yê ke ewil game erzenê cinîyan tepişnayî. Tecrîd tenê serê Birêz Ocalanî de nîno rayraberdiş. Nika şexsê Leyla Guven de wazenê pêro cinî, pêro sîyasetmedarê cinî yê kurdî ceza bikerê. Bi nê cipersayîşî wazenê nê bikerê û heyfê cinîyan bigîrê. La cinîyan tu wext sere nêtewênayo. Cinîyê ke cuye bîyaye kenê, nêeşkenê bierzê teberê cuye."

 

‘Vindertişê cinîyan AKP-MHP tersnayo’

 

Verfeka Partîya Çep a Keske ya Wanî Gonul Uzunay zî dîyar kerd ke têkoşînê şarê kurdî têkoşînêk pîl û  bi heybet o. Gonule dewam de dîyar kerd ke nê têkoşînî de ewil têkoşînê cinîyan ca gêno û wina vat: "Vindertişê Leyla Guvene bî sembolê pêro cinîyanê sîyasetmedaran ê kurdî. Leyla Guvene hemverê tecrîdê serê Birêz Ocalanî kewtebî grev û 200 rojî grev de mende. Nê têkoşîn kêm bo zî tecrîd şikina û dîyalog pê ame. La vindertişê cinîya kurde AKP-MHPyî tersneno. Seba nê zî zextan kenê. Eşkerayîya siyasetmedaranê kurdan suc yeno qebûlkerdiş. Her çiqas dadgehe vaja nê vatişî suc nîyê zî qerarî nînê naskerdiş û dosya yenê akerdiş."

 

‘Wazenê krîmînalîze bikerê’

 

Gonule peynîya qiseykerdişê xo de dîyar kerd ke faşîzm bi tepiştiş û merdişan serê lingan de vindeno û  her roje sîyastmedarê kurdî yenê tepiştiş û wazenê demokrasî û rêxistinbîyayîşî kurdan krîmînalîze bikerê. Gonule vat ê tu wext serkewte nêbîyê û wina vat: "Seba vindertişê cinîyan bi sernêkewtî, cinîyan her wext faşîzm tersnayo. Parlamenterîya Leyla Guvene vistî. Aye tepişnayî la Leyla vat, ez tîya ya. No vindertiş, vindertişêk pîroz o. Ez eşkena vaja ke Leyla Guven yew sîyasetmedara tewr muhîm ya seserra 21ine ya."