MERKEZÊ XEBERAN - Silêmanîye de cinîyêke ciwane seba sebebêk nêdîyar pirdêke ra kewte war û cayê hedîse de dinyaya xo bedelnaye.

 

Saetê rewî yê serê sibayî de cenazeya cinîyêke ciwane serê cadeyê binê pirda Kampa Newe ya Unîversîteya Silêmanîye de ameye vînayîş. Dima ra tîmê weşîye resayî cayê hedîse û cenaze berdîya nêweşxane.

 

Berpirsîyarê beşê lezgînî yê nêweşxaneyê Silêmanîye Saman Nadir derheqê hedîse de neql kerd ke hedîse saete 06:12ine de virazîyaya, cinîyêke emrê aye mabêne 18-20 serrî de pirda Unîversîteya Silêmanîye ra kewta war û dinyaya xo bedelnaya.

 

Saman Nadir dîyar kerd wexto ke tîmê weşîye resayî cayê hedîse, cinîya ciwane dinyaya xo bedelnabî. Sewbîna ame dîyarkerdiş ke heta nika zî sebebê hedîse nîno zanayîş ke întîxar o yan zî qeza bîya.