SEMSÛR - Sevgî Demîre ya ke Semsûr de dimayê erdlerzî bi tutan reyde sey zerrîwaze xebetîya dîyar kerd ke herême de tutê kênayî yenê zewecnayîş û tutê koçberî zî herêmê erdlerzî de zêde raştê bêtêduştî yenê. 

 

6ê Sibate de merkezê ci Mereş de erdlerz qewimîya û 11 bajaran de bî sebebê rijnayîşî. Tesîrê erdlerzî hema zî dewam keno. Zerrîwaza Rayîrberîya Krîzî ya Heqê Tutan Sevgî Demîre derheqê tesîrê erdlerzî yê serê tutan de qisey kerd. 

 

Sevgîye da zanayîş ke dimayê erdlerzî tewrê Tora Rayîrberîya Krîzî bîya û ameya bajar û wina vat: “Sere de tay sebeban vera nêeşkaya bêra herême. 3-4 aşmî badê erdlerzî ez ameya. Ez bi Tora Krîzî reyde kewta têkilî û musaya ke lazimî xeylê zêde yo. Ez zî sey zerrîwaze ameya. Mi hewl da seba tutan mîyanê paştîdayîşî de biba. 

 

'Tutî awa lêşin vera nêweş kewenê’ 

 

Sevgîye bale ant serê nufusê tutan û vat: “Xeylê heqê înan yenê binpaykerdiş. No seba ma çimdarîyêk krîtîk bî. Hetê weşîye, perwerdeyî û xeylê babetanê bînan de kêmanîyê tutan esto. Kêmanî xeylê zêde yo. Çîyo ke destê ma ra ame ma kerd la hema zî esto. Her kes raşteyan de ca nêgirewt. Raşte veng mendbî. Tutî bi awa lêşin kay kenê. Awa lêşin şiminenê. Coka ra zî her tim nêweş kewenê.”

 

'Karkerîya tutan dest pêkerdo’ 

 

Sevgîye ard ziwan ke semedo ke tutî nêşinê mekteban rîsk zî vejîyenê raşte û wina dewam kerd: “Tutî sey karkerê înşaat, tekstîlî xebetîyenê. Tutî madeyê tîryakî şixulnenê. Nê çîyî tutan de yenê dîyîş. Ma her çend ke paştîdayîşê psîkolojîk bidê zî raşte de STK, aktîvîstî kêm bî. Dewlete na babete de tu çîyêk nêkerd. Seba şertê perwerdeyî pê bêrê ma xeylê reyan veng kerd la agêrayîş çinî bî. Tutî nêşinê mekteban. Ma hewl da ma tîya de raşteyê kayî awan bikerî la nêbî. Ganî paştîdayîşê psîkolojîk bêro dayîş. Ma kêmanîyan zêde ciwîyayî. Ma nika zî hewl danê la ma mird nêkenê.” 

 

'Tutê koçberî nêeşkenê şêrî mekteban’ 

 

Sevgîye bale ant rewşa tutanê koçberan ser û da zanayîş ke mekteb ameyî awankerdiş la çi heyfo ke tutê koçberî teberê nê prosesî de manenê û hemverê tutan de nizdîbîyayîşê nijadperestî yeno mojnayîş. Sevgîye qiseykerdişê xo wina dewam kerd: “Hem rewşa ekonomîye vera hem zî şertan vera dewlete îmkan nêdana tutan, tutî perwerdeyî ra bêpar yenê verdayîş. Tutê kênayî yenê zewecnayîş, ya zî karê cîyayan de yenê şixulnayîş. Hêvîya tutan çin a. Çîyo ke vînena Semsûr de derheqê ameyox û perwerdeyî de hêvîya tutan çin a.” 

 

Sevgîye qiseykerdişê xo yê peyênan de nînan vat: “Tutî yenê îstîsmarkerdiş. Dadî û pîyê înan şîdet bi înan kenê. Vera hende binpaykerdişê heqan dewlete veng nêkena. Tutî sey tutan ne eşkenê kay bikerê, ne zî eşkenê perwerde bigîrê. Gelo ma nê vengîyan senî bigîrê? Tu dewletêke hende gird ke hende pratîk de çinî ba çin a. Koçberî nêeşkenê xo biresnî îmkanê weşîye. Zimsitan vernîya ma de yo. Do rojê zehmetin bêrî ciwîyayîş. Hêvîdara tedbîr bêrî girewtiş la qet bawer nêkena.”