Oznur Deger

 

MÊRDÎN - Nisêbîn de çawîşo pispor Eyup K.yî xo sey muhendîsî dabî şinasnayîş û bi bahaneyê perskerdişê adresî tarîx û cayê cîyayan de 4 tutî vistbî wesayîtê xo û tacîzê cînsî bi înan kerdbî. Gerreyê tutan ra dima kerdox ame tepiştiş û îdîanameyê ‘îstîsmarkerdişê tutan, kesî azadîya xo ra bêpar verdayo’ ke ameybî amadekerdiş de heta 20 serrî ceza yena waştiş. 

 

Qezaya Nisêbînî ya Mêrdînî de çawîşo pispor Eyup K.yî xo sey muhendîsî dabî şinasnayîş û bi bahaneyê perskerdişê adresî tarîx û cayê cîyayan de 4 tutî vistbî wesayîtê xo û tacîzê cînsî bi înan kerdbî. Tutê bi nameyê A.D (18) û H.O (18) ke mabenê aşmanê Çele-Nîsana 2023yî de raştê îstîsmarî ameybî hedîse mamosteyê xo yê rehberî rê vatbî. Keye pêhesîyayîşê hedîseyî ra dima derheqê kerdox Eyup K.yî de gerre kerd û kerdox ame tepiştiş. 

 

Xo sey muhendîsî dabî şinasnaayîş 

 

Îdîaname de ame dîyarkerdiş ke kerdox Eyup K.yî tarîx û cayanê cîyayan de bi bahaneyê persayîşê adresî yê cayê merkezê Kulturê Mîtanî wesayît dayo vindertiş û bi tutan reyde kewto dîyalog. Ame dîyarkerdiş ke kerdox hîrê serrî Nîsêbîn de sey cendermeyê çawîşê pispor xebetîyayo û xo tutan rê sey muhendîsî dayo naskerdiş û cayê Merkezê Kulturê Mîtanî persayo. Goreyê îdîanameyî tutî ci rê vatê la vato bê binişne wesayîtî cayê ci bimojne û wesayît de tacîzê cînsî kerdo. Tutê ke na rewşe fehm kerdî wesayît ra vejîyayî û kerdox dûrî kewto.

 

Heta 20 serrî ceza 

 

Îdîaname de derheqê kerdoxî de sucê ‘îstîsmarkerdişê tutan, kesî azadîya xo ra bêpar verdayo’ ra heta 20 serrî ceza yena waştiş. Îdîaname hetê Yewine Mehkemaya Cezaya Girane ya Mêrdînî ra ameye qebulkerdiş. Yewine roniştişê dewaye ke kerdox ci ra yeno muhakemekerdiş, ame dîyîş. Roniştişê mehkema de dewamkerdişê tepiştişê kerdoxî ame dayîş û roniştiş taloqê 30ê teşrîna verêne ame kerdiş.