Netîceyê DNAyî nêvindertî goristanê bêkesan de defin kerdî

 

 

 

Şehrîban Aslan

 

AMED - Ayten Gulcu dîyar kerd ke cenazeya kênaya aye goristanê bêkesan de defin kerdê û vat: "Pêwa ke ma seba testê DNAyî gonî dabî zî bê netîce, berdê defin kerdê."

 

Cenazeyê şerwana YJA STARî Leyla Gulcu (Dîcle Eylem) a ke 4ê Tebaxe de Koyê Bagokî de pêrodayîş de dinyaya xo bedelnaye, nêdayî keyeyê aye. Keyeyî 17ê Tebaxe de muracatê Serdozgerîya Komare ya Mêrdînî kerd û nûmeneyê DNAyî zî dayê. Pêwa ke muracatî ra xeylêk rojî derbaz bîyê zî netîceyê DNAyî nêameyo eşkerakerdiş. Dima ra keyeyî 7 Êlule de reyke bîn şîyo Mêrdîn, seba cenazeya kênaya xo bigîro reyna muracat kerdo. La serdozgerî keyeyî ra vato ke înan nimûneyê gonî hema newe şirawito test. Dayîka Leyla, Ayten Gulcu reaksîyon vera rewşe mojna.

 

'Kênaya mi zaf ameyîne heskerdiş'

 

Aytena ke cenazeya kênaya xo waşt, bi vatişê Leyla dest bi qiseykerdişê xo kerd. Aytene vat, “Ez seba ke kênaya min a nêvena, Leyla merdimêke zaf û zaf baş bî. Bi pîlan reyde pîl, qijan reyde qije bî. Aye kesêke zaf rast bî. Ez nêzana senî başbîyayîşê kênaya xo şima rê qal bikerî."

 

'Dimayê 12 serran agahîya aye mi rê ameye'

 

Aytene, ard ziwan ke tedayê dewlete yê serê înan giran o û vat Leyla, hemverê tedayan de tewrê PKKyî bîya. Aytene dîyar kerd ke 12 serrî verê kênaya aye tewrê tevgerî bîya û wina vat: "Vernîya ke ez agahîya ci ra bigîrî, mi hewn dî ke a roja ke şehîd bîye, dinyaya xo bedelnabî. Eynî roje de agahîya aye ameye ke dinyaya xo bedelnaye. Kesê bi telefonî qisey kerd vat, 'mi rêça engiştanê aye ewnîya, se ra 90 îhtîmal esto ke kênaya şima ba'. Ma şî Mêrdîn û ma muracatê serdozgerî kerd. Ma ra vatî şêrê nêweşxane û teşhîs bikerê. Ma şî nêweşxane û ma cenaze teşhîs kerd. Ma ra vatî seba testê DNAyî gonî bidê. Ma vat, verê bi rêçe engiştan ameya vînayîş û lazimî bi nimûneyê gonî çin o la înan ma ra vatî ke xeylêk têmîyanî esto."

 

'Wa vengê ma bêro eşnawitiş'

 

Aytene, ard ziwan ke 3 hewte dimayê dayîşê gonî reyke bîn şîyê Mêrdîn û dîyar kerd ke dozgerî înan ra vata, "Nêweşxaneyî nimûneyê gonî, newe şirawitê test." Aytene, ard ziwan ke cenazeya kênaya aye vernîya ke netîceyê DNAyî bêra girewtiş, goristanê bêkesan de ameya definkerdiş û wina dewam kerd: “Seba nê bêhuqûqî ma muracatê ÎHDyî kerd. Înan vat ke ê do serê babete de vinderê. Eke ma tu wext muracatê dozgerî nêkerdêne, ma nêvatêne ke çira goristanê bêkesan de ameya definkerdiş. Labelê ma şî ma gonî da û ma aye nas kerd la netîceyê DNAyî nêvindertî, berdî goristanê bêkesan de defin kerdî. Ma seba na rewşa xo tenê hîs kerd, ma wazenê her kes hemverê na rewşe de reaksîyon bimojno. Ez venga sazgeh û selahîyetdaran kena ke vengê ma bieşnawê."

 

'Çîyo ke kerdî bêwijdanî yo'

 

Aytene vat ke bêwicdanî yo ke cenaze yenê îşkencekerdiş û bi kargoyî yenê şirawitiş û wina vat: "No bêwicdanî yo. Amanc oyo ke keyeyan mexdûr bikerê û înan rê peyser game bidê eştiş. Heta key do nê zulmî bikerê? Na rewşe do heta key şêro? Ma kurd û dayîkê kurdî nêwazenê tutê tu kesî bimirê. Ma  çiqas dejenê zî ma vanê aştî. Seba ke xêrcê aştî tu çareserî çin a. Wa no zulm peynî bibo."