AMED - TJAye derheqê serbestverdayîşê 3 kesê ke Mêrdîn de tecawuzê cinîyêke kerdbî de eşkerayîyêke nuştekî da û eşkerayîye de venga tewrbîyayîşê çalakîya ewro ya saet 16.00î kerd. qezaya 

 

Dêrikê Mêrdînî de qorîcî Yakup A. û embazê ci Çetin T., Harun Y. û Suud Ç. bi hawayêkê sîstematîk tecawuzê cinîyêke kerdbî. Versucê tecawuzî ameybî destbendkerdiş û dima ra serbest ameybî verdayîş. Qewimîyayîş ra dima Têgêrayîşê Cinîyê Azade (TJA) eşkerayîyêke nuştekî da. TJAye eşkerayîya xo de venga tewrbîyayîşê çalakîya ewro ya saet 16.00î kerd. Sewbîna TJAye eşkerayîya xo de wina vat: “Do dewleta tecawuzkar û çeteyê ci hesab bidî cinîyan!” Do ewro TJAye bi serkêşîya cinîyan Parka Karayollariyî ya Mêrdînî de eşkerayîya çapemenîye bida.

 

'Îqtîdarê AKP-MHPyî zîhnîyetê DAÎŞî dewam keno’ 

 

Eşkerayîye de cinîyan virst vîr ke kerdox serbest ameyî verdayîş û wina ame vatiş: “Nika pratîkê meşrukerdişê qirkerdiş, tecawuzkerdiş, şîdetê vera cinîyan ke bi destê dewlet-camêrd- muhakemeyî yeno kerdiş, dewre de yo. Îqtîdarê faşîst ê AKP-MHPyî dewamê zîhnîyetê DAÎŞî yo, bi polîtîkayê şerê taybet Kurdistan de zemînê meşrukerdişê tecawuzkerdişê cinîyan awan keno. Bi polîtîkayê bêcezaverdayîşî kiştoxan paweno. Ma qerarê muhakemeya camêrdî ê serbestverdayîşê versucê tecawuzî qebul nêkenê. Ma nê qerarî lanet kenê." 

 

'Ma do destur nêdî polîtîkayê şerê taybetî' 

 

Cinîyan eşkerayîye de bale ant serê polîtîkayê şerê taybet û wina vatî: “Temsîlkarê nê zîhnîyetê tarî, îqtîdarê AKP-MHPyî bi destê qorîcî û leşkeran polîtîkayê şerê taybet, bi taybetî zî vera cinî û ciwanan de keno dewre. Wazenê bi nê metodî cinî û ciwanan bêîtîbar bikerê û înan bixapênê. Ma do sey cinîyê Kurdistanî destur nêdî polîtîkayê şerê taybetî. Ma do polîtîkayê dişmentî yê hemverê cinîyan ê îqtîdarê faşîst ê AKP-MHPyî her ca de teşhîr bikerê. Ma do rêxistinbîyayîşê xo gird bikerê, ma do bi rihê têkoşîn û serewedarnayîşî vera nê zîhnîyetî de vinderê.”

 

'Ma do her raşteyî de têkoşînê azadîya cinîyan gird bikerê' 

 

Eşkerayîye de venga tewrbîyayîşê çalakîya ewro ame kerdiş û wina ame vatiş: “Seba ke ma kulturê tecawuzî mehkum bikerê, ma do her raşteyî de têkoşînê azadîya cinîyan gird bikerê. Ma do serê nê esasî de ewro saet 16.00î de rayîr ra şîyayîş pê bîyarê. Sere de cinî ma venga heme şarî kenê ke tewrê çalakîye bibê. Wa çeteyê tecawuzkar ê dewleta tecawuzkar na rey bêrê tepiştiş.”