Rojda Aydin

 

WAN - Parlamentera Partîya Çep a Keske ya Wanî Gulderen Varliye derheqê operasyonên leşkerî de qisey kerd û ard ziwan ke nê hêrişî dewamê polîtîkayê serranê 90an ê û vat: “Her çend ke metodê hêrişan bibedilî zî çîyo ke seba ma nêbedelîyeno, dewamkerdişê têkoşînî yo.”

 

Dewê Kurdistanî de bi bahaneyê ‘asayîşî’ operasyonê leşkerî yenê kerdiş. Netîceyê nê operasyonan de hemwelatijî yenê tehdîtkerdiş, koçberî bi înan yeno ferzkerdiş û ware yenê texrîbkerdiş. Nê kerdişê ke yenê kerdiş zî bêceza yenê verdayîş. Tewr peynî Qelqelî, Farqîn, Gever, Tetwan û Xîzanî de operasyonê leşkerî pê ame û îşkence bi hemwelatijan ame kerdiş. Derheqê babete de parlamentera Partîya Çep a Keske ya Wanî Gulderen Varliye ajansê ma JINNEWSî rê qisey kerd.

 

‘Binê nameyê ‘asayîşî’ de dewî yenê vengkerdiş’

 

Gulderene destpêkerdişê qiseykerdişê xo de bale ant serê polîtîkayê hemverê kurdan ke se serrî yo yenê rayraberdiş û vat: “Ewro zî Kurditan de dew û bajarî yenê vengkerdiş. Binê nameyê ‘asayîş’î de zozanî dest bi vegnkerdişî kenê û heta ver bi dew û bajaran ra şinê. Wextê vengkerdişî de îşkence bi dewijan kenê û dewijan tehdît kenê. Na polîtîka se serrî yo ke tu çîyêk dest nêfîna. Kişta nê caardişan de sewbîna zî dişmentîya xozaye yeno kerdiş. Îqtîdar polîtîkayê cîyayan dano vernîya xo û wazeno dewan veng bikero. La ma sey şarê kurdî nê çîyî qebul nêkenê. Eynî wext de ma do hemverê îşkenceyî de vinderê. Wexto ke şarê ma wayîrê dew û zozananê xo bivejîyo do tu kes nêeşko ma welatê ma ra bivejno.”

 

‘Kerdoxê serranê 90î nêameyî cezakerdiş' 

 

Gulderene dîyar kerd ke polîtîkaya serranê 90î ewro bi hawayêkê cîya dewre de ya û ard vîr ke serra 90î de bi hezaran hemwelatijî ameyî vînîkerdiş, ewro dadîyê înan kiştoxê tutanê xo gêrenê û wina dewam kerd: “Eke kiştoxê înan biameyêne dîyîş û cezakerdiş do ewro hemwelatijî raştê îşkence û hêrişan nêameyêne. Do Qelqelî, Farqîn û bajarê bînan de hedîseyêke winasî nêameyêne ciwîyayîş. Wezîrê Karê Zereyî yê verên Suleyman Soylu her tewirê hêriş û zilmî bi şarê kurdî kerd. Her gamêke faşîzmî aver berd û vatêne 'Ez nê karî de başêr a’. Soylu her tim rîpelê xo de kerdişanê xo pare kerdêne. Wezîrê Karê Zerreyî yê nika zî ser dişmentîya kurdan û faşîzmî de xo awan keno.”

 

‘Çîyo ke qet nêbedelîya têkoşîn bî’ 

 

Gulderene da zanayîş ke çend îqtîdar bibedelîyî zî seserrî yo ke no îşkenceyê hemverê kurdan dewam keno û wina vat: “La seba ma kurdan çîyêk nêbedelîyeno, ma qet fek têkoşînê xo ra nêverda. Têkoşînî vera zî her tim zilm dewam keno. Hemverê înan polîtîkayan de seserrî têkoşînêk ma yê 50 serrî esto. Se beno wa bibo ma heqdar ê. dewan de operasyon seba kiştişî yeno kerdiş û îşkence bi dewijan kenê. Dima ra xo rê vanê ‘Ez dewletêk dîndar a’. La dîn de sere bedenê merdiman de îşkence nîno kerdiş. Nê caardişê înan qebulnêkerdişê kurdan o.”

 

‘Ganî ma bibê yew’ 

 

Gulderene qiseykerdişê xo yê peyênan de ard ziwan ke binê nameyê ‘asayîş’î de konseptêk şerî yê cîya yeno rayraberdiş û vat: “Beno ke reng û şeklê hêriş û zilmî bibedelîyo, la ewro bi hawayêkê cîya dewam keno. Sewbîna ewro kesê ke aştî, azadî û têduştî wazenê rê dişmenî yeno kerdiş. Kam bi waştişê xo vano ci rê ‘terorîst’. Dewlete seba menfîetê xo her tim zilmê kurdan kena. La ma zî têgêrayîşêk şarî yê. Hemverê înan caardişan de ma eşkenê vengê xo berz bikerê. Hemverê înan polîtîkayan de seba ke ma vengêk gird bivejnê ganî ma bibî yew. Farqîn û Qelqelî de şîdeto ke kerdî, xeylê gird o. Eke ma bibê yew ma eşkenê vengê xo berz bikerê. Ganî ma wayîrê cuya xo bivejê.”