Dîlan Babat /Melek Avci

 

ANQARA - Parlamentera Partîya Çep a Keske Tulay Hatîmogullari, dîyar kerd ke amancê kampanyaya înan ke do rojê bêrê de hemverê tecrîdê serê Rayberê PKKyî Abdullah Ocalanî de bidê destpêkerdiş tenê seba wedaritişê tecrîdî de nîyo û eynî wextî de seba azadîya fizîkî ya Abdullah Ocalanî yo. 

 

Partîya Çep a Keske mabêne 10-11ê êlule de Merkezê Kulturî yê Nazim Hikmetî konferansê xo yê pîlî bi sloganê "Bi vurnayîşî ver bi azadîye" organîze kerd. Bi Konferansê ke 800 delege tewrê bî û kombîyayîşê ke ameyî kerdiş reyde konferans bi  qerarê muhîm peynî bi. 

 

Parlamentera Partîya Çep a Keske ya Edeneyî Tûlay Hatîmogûllari derheqê konferanso ke organîze kerd û kampanyaya ke do demê bêro de hemverê tecrîdê serê Rayberê PKKyî Abdullah Ocalanî bidê destpêkerdiş de ercnayîş kerd.

 

‘Planê qirkerdişî hema aktîf o'

 

Tûlaye, ard ziwan ke înan sey Partîya Kesk a Çepe konferansêk xeylêk muhîm organîze kerdê û vat: “Yew babeta ma ya sereyîn e babeta tecrîdî ya.  Rejîmê yewcamêrdî ke Tirkîya rayra beno, rejîmê dîktator ê faşîstî nêeşkenê cîya bigîrê dest. Nê vurnayîşî de rejîmo ke binê îdarekarîya hukmetê AKPyî de zî ma dî ke polîtîkaya dewlete ya serê problemê kurdî bi eynî zîhnîyetî dewam keno û nêvuryeno. Dimayê peymana Dolmabahçeyî, hem serê herra Tirkîya, hem Sûrîye, Iraq, Îran û çar parçeyê Kurdistanî planê qirkerdişê şarê kurdî dewam keno. Beşêk nê qirkerdişî rê zî tedayî giranî yê serê tepişteyan û tecrîdê Îmraliyî yo.”

 

Amanc azadîya fîzîkî ya Ocalanî yo

 

Tûlaye, ard ziwan ke yew netîceyê tecrîdî serê Rayberê PKKyî Abdullah Ocalanî tecrîdê zîndanan o û vat:  "Zextê nê rejîmî zîndanan açarnayo merkezê îşkence. Zextê teberî her ke zêde benê, tesîrê xo zîndanan rê kenê û şîdetê zîndanan 3 qatê xo zêdeyêr beno. Yew problemo tewr bingehîn ê zîndanan; destûr nîno dayîş ke Ocalan û tepişteyê ê reyde bi keye û avûkatanê xo reyde pêvînayîş bikerê. No caardiş hiqûqê şerî de zî çin o. Zîndanan de kerdişê bêqanûnî yê seke veşnayîşê înfazî û cigêrayîşê fekî yeno kerdiş. Dewaya padayîşê HDPyî û krîmînalîzekerdişê sîyasetê ma yê demokratîk rasterast bi tecrîdî reyde girêdaye yo. Seba peynîkerdişê tecrîdî û tedayê serê tepişteyan. Bi peynîkerdişê tecrîdî hem waştişê partîyê sîyasî yê demokratîk û hem zî waştişê keyeyê tepişteyan o. Bi nê pêrûnan reyde ma zî plan kenê ke demê bêro de  kampanyayêke bidê destpêkerdiş la ma detayê ci tam niqaş nêkerd. Amanco sereyîn ê kampanyaya ma; şikinayîşê tecrîdî û waştişê azadîya fîzîkî ya birêz Ocalanî yo.”

 

'Startê kampanyaye do rojê bêro de bêro dayîş’

 

Tûlaye dîyar kerd ke îqtîdarî sererastkerdişêk bîn ê înfazî kerdo la hema muhtewayê ci zelal nîyo û wina vat: “Wextê rêziknameyê verî yê înfazî ame meclîs, ma dîyar kerd ke ganî tepişteyê sîyasî zî rêziknameyî feyde bigîrê. Serdemê newe yê komare de kerdişê rojeve ya efuyêk pêroyî seba sîyasiyan zaf muhîm o. Bipeynîkerdişê zextê serê Birêz Ocalanî yeno manaya akerdişê berê xeta aştîye ya bi rûmet a problemê kurdî de bi diyalog û aştîye yo. Hem peynîkerdişê şerê Tirkîya û hem zî derbasbîyayîşê Tirkîya seba rolêk bîn ê şerê Rojawanî de muhîm o. Rojawan de xetimnayîşêk pîl esto û sebebê nê zî nêçareserîyê problemê kurdî yo ke hetê îqtîdarê Tirkîya ra nîno çareserkerdiş. Çareserîyê problemê kurdî yeno manaya akerdişê berê aştîye hem Tirkîya û hem zî Rojhelatê Mîyanên. Ma na kampanyaye bi yewîya pêro hemkaran bidê destpêkerdiş.”

 

'Hetêk ra kampanyaye parlamento de biba hetêk ra zî kuçeyan de’

 

Tûlaye bale ant serê prosesê sîyasî û wina vat: “Nê weçînayîşî nîşanê ma da ke nîmeyê welatî hemverê nê rejîmê bîyaye yo. Seba kesê hemverê rejîmî yê muhîm o ke serê bingehêk demokratîk tifaqê tewr hîra pê bîyarê. Sey Partîya Çep a Keske; wextê bêro de ma bi qerar ê ke Tirkîya bi pêro babetê siyasî û dînamîkê komelî rê hemverê faşîzmî xeta têkoşînî aver bêrê. Qerarê ma yê konferansê ma de vejîyayî werte nînan mojneno. Wextê bêro de ma do serê bingehêk yewgirewte, demokratîke hemverê faşîzmî xetêke xurt ê têkoşînî rayra berê. Na xeta têkoşînî pêro hêzê komelî mîyanê xo de hewêneno. Hetêke na kampanyaye do meclîs de bo û hetê ci yê bîn zî kuçeyan de ba.”