Şehrîban Aslan

 

AMED - Dayîka Aştîye Afîfe Kartale ya ke vera her tewirê zilmê dewlete de seba aştîyêke bi ercaye têkoşîn rayra berde wina vat: “Cenazeya kênaya mi de zî mi aştî waşt.” 

 

Dayîka Aştîye ke bi serran vera şerî de têkoşîn kerd, her tewirê teda û îşkenceyî reyde rî bi rî mende. Dayîka aştîye ke destê aştîye derg kena tu cewabê înan nîno dayîş. Înan dayîkan ra yew zî Afîfe Kartale ya ke seba aştîye têkoşîn kena ya. Afîfeye hema emrê xo yê şenikî de yena zewecnayîş û o wext tedaya dewlete vînena. Kênaya aye Têkoşîne serra 2011î de tewrê sefanê PKKyî bena û serra 2017î de dinyaya xo bedilnena. Lajê aye rê 22 serrî ceza yena birnayîş. Afîfeye vera hende çîyan têkoşînê xo dewam kena. 

 

Emrê şenikîye de yena zewecnayîş

 

Afîfeye dewa Qîzlalî ya Farqînî de yena dinya. 14 serrîya xo de yena zewecnayîş. Afîfeye dîyar kerd ke xeylê zehmetîyan anta û 4 tutê aye dewe de yenê dinya. Afîfeye dîyar kerd ke vera heme zor û zehmetîyan dewa înan zî ameya veşnayîş. 

 

‘Qorîcîtî ame ferzkerdiş’ 

 

Afîfe dîyar kerd ke sebake qorîcîtî qebul nêkerdî dewa înan ameya veşnayîş û wina vat: “Heme dewê dormeyê ma qebul kerdî. Dewa ma de heta serê sibayî pêrodayîş qewimîya. Ma nêeşkayêne bivejê teber. Bado ke pêrodayîş vindert ma vejîyayî. Ma cenazeyê di kesan dî. Îşkenceyê girdî bi înan kerdbî. Ez şîya serê cenazeyan bermaya. Leşker ame vat şo ma do to zî bikişê. Ma dûr vistî. Ez şîya keye. Vatî dewe veng bikerê. Her roje teda kerdêne. Ma çare nêdî. Ma vejîyayî.”

 

‘Cenaze poşet de dayî mi’ 

 

Afîfeye da zanayîş ke serra 1993î de bado ke dewe ameya veşnayîş ameya Amed û wina dewam kerd: “No 30 serrî de mi xeylê çîyan dî. Tutê mi gird bîyî, ma înan şirawit mekteb. Têkoşîne mi zî şîyêne mekteb. Rojêk mamosteyê aye mi gêra. Vat kênaya to 40 roje yo nîna mekteb. Her tim Têkoşîne destbend kerdêne, tepiştêne. Dewlete îşkence bi aye kerdêne. Kênaya mi her çî verda û şî. 7 serran koye de mend. Licê de şehîd bîye. Pîyê aye seba cenazeye şî. La cenaze raşte de çinî bî. Poşet dabî. Mi poşet girewt û ez bi saetan serê poşetî de keye de vinderta. Dima ra ma defin kerd.”

 

’19 serrî bî 22 serrî ceza dayî’ 

 

Afîfeye ard ziwan ke lajê aye serra 2017î de hema 19 serrîya xo de yeno tepiştiş û 22 serrî ceza ci rê yena birnayîş. Afîfeye qiseykerdişê xo wina domna: “Lajê mi sereştişê keyeyî de ame destbendkerdiş. 15 rojan nezaret de mend û îşkence bi ci kerdî. No 7 serrî yo ke tepişte yo. No 8 aşmî yo zîndanê Tîpê Yyî yê Antalya de yo.”

 

‘Ez do her tim aştîye bipawa’ 

 

Afîfeye tewr peynî nê çîyan vat: “Çîyê ke ameyî sereyê mi vera êdî ez nêeşkena xover bida. Nêweşîyê tansîyon û şekirî mi de estî û gurçikê mi îflas kerdî. Rojanê verênan de zî mi krîzê zerrî derbaz kerd. Vera heme çîyan ez do têkoşînê xo dewam bikera û cenazeya kênaya xo de zî mi aştî waşt.”